DakshTimes News Network
काशिनाथ शिंदे.पुणे, दि. २२ जून : वानवडी परिसरात रविवारी पहाटे पोलिस आणि सराईत आरोपी यांच्यात झालेल्या थरारक चकमकीत एका पोलीस अधिकाऱ्याने स्वसंरक्षणार्थ झाडलेल्या गोळीने आरोपी करण सिंग जखमी झाला. त्याच्यावर सध्या ससून रुग्णालयात उपचार सुरू असून संबंधित पोलीस अधिकारीही किरकोळ जखमी झाला आहे.
मिळालेल्या माहितीनुसार, करण सिंग याच्यावर ३० हून अधिक गंभीर गुन्ह्यांची नोंद असून तो वानवडी परिसरात येणार असल्याची माहिती पोलिसांना मिळाली होती. त्यानुसार पोलिसांनी परिसरात सापळा रचून आरोपीला पकडण्याची तयारी केली होती.
पहाटे सुमारे ५.३० ते ६ वाजण्याच्या दरम्यान पोलिसांनी आरोपीला अडविण्याचा प्रयत्न केला. मात्र, आरोपीने पोलिसांवर अग्निशस्त्रातून गोळीबार केल्याचे सांगण्यात आले. अचानक झालेल्या या हल्ल्यानंतर उपस्थित पोलीस अधिकाऱ्याने स्वसंरक्षणासाठी प्रत्युत्तरादाखल गोळी झाडली. या गोळीबारात करण सिंग जखमी झाला.
घटनेनंतर जखमी आरोपीला तातडीने ससून रुग्णालयात दाखल करण्यात आले. या प्रकरणाचा पुढील तपास पोलीस करत असून घटनेमागील सर्व बाबींचा सखोल तपास सुरू आहे.
