DakshTimes News Network
पिंपरी-चिंचवड पोलिसांची धडाकेबाज कारवाई ; १२.९५ लाखांचा मुद्देमाल जप्त
काशिनाथ शिंदे
पिंपरी : आळंदी परिसरातील चैन चोरीच्या गुन्ह्याचा पिंपरी-चिंचवड गुन्हे शाखेच्या मालमत्ता गुन्हे विरोधी पथकाने अवघ्या काही तासांत छडा लावत तीन आरोपींना जेरबंद केले. आरोपींकडून चोरीस गेलेली सोन्याची चैन आणि गुन्ह्यात वापरण्यात आलेले वाहन असा एकूण १२ लाख ९५ हजार रुपयांचा मुद्देमाल जप्त करण्यात आला.
आळंदी पोलीस ठाण्याच्या हद्दीत एका नागरिकाच्या गळ्यातील सोन्याची चैन दोन अज्ञात इसमांनी जबरदस्तीने हिसकावून नेली होती. याप्रकरणी आळंदी पोलीस ठाण्यात गुन्हा दाखल करण्यात आला होता. त्यानंतर गुन्हे शाखेच्या मालमत्ता गुन्हे विरोधी पथकाने समांतर तपास सुरू केला.
१३ जून रोजी पथकाला आरोपींबाबत गोपनीय माहिती मिळाल्यानंतर पोलिसांनी सापळा रचून तिघांना ताब्यात घेतले. चौकशीदरम्यान त्यांनी चैन चोरीचा गुन्हा केल्याची कबुली दिली.
अटक करण्यात आलेल्या आरोपींमध्ये वैष्णव शरद कदम (वय २०), सचिन जालिंदर कदम (वय ४२) आणि विजय ज्ञानेश्वर कदम (वय ३३, सर्व रा. निरगुडी, ता. हवेली, जि. पुणे) यांचा समावेश आहे.
पोलिसांनी आरोपींकडून ३३.८१० ग्रॅम वजनाची सोन्याची चैन (किंमत ४ लाख ९५ हजार रुपये) तसेच ८ लाख रुपये किमतीचे चारचाकी वाहन जप्त केले. एकूण १२ लाख ९५ हजार रुपयांचा मुद्देमाल हस्तगत करण्यात पोलिसांना यश आले आहे.
पोलीस आयुक्त विनयकुमार चौबे यांच्या सूचनेनुसार सहपोलीस आयुक्त शशिकांत महावरकर, अतिरिक्त पोलीस आयुक्त सारंग आवाड, पोलीस उपायुक्त (गुन्हे) रोहिदास पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली ही कारवाई करण्यात आली. ही कामगिरी मालमत्ता गुन्हे विरोधी पथकाचे वरिष्ठ पोलीस निरीक्षक संजय चव्हाण, पोलीस निरीक्षक पांडुरंग देवकाते, पोलीस निरीक्षक महेश खांडे तसेच पोलीस अधिकारी आणि अंमलदार यांच्या पथकाने पार पाडली.
