DakshTimes News Network
काशिनाथ शिंदे : चिखली
चिखली येथील सिद्धीविनायक पब्लिक स्कूल व ज्युनिअर कॉलेजमध्ये नवीन शैक्षणिक वर्षाच्या पहिल्या दिवशी अकरावीच्या विद्यार्थ्यांचे पारंपरिक पद्धतीने उत्साहात स्वागत करण्यात आले. महाविद्यालयाच्या प्रवेशद्वारावर विद्यार्थ्यांचे औक्षण करून त्यांना गुलाबपुष्प देण्यात आले. तसेच पुष्पवृष्टी करत विद्यार्थ्यांना नव्या शैक्षणिक प्रवासासाठी शुभेच्छा देण्यात आल्या.
कार्यक्रमाला संस्थेचे सचिव मारुती जाधव, अध्यक्षा निर्मला जाधव, पालक, शिक्षक व शिक्षकेतर कर्मचारी उपस्थित होते. विद्यार्थ्यांसाठी स्वागत समारंभासह परिचय सत्राचे आयोजन करण्यात आले. यावेळी प्राध्यापकांनी विद्यार्थ्यांना बारावीच्या अभ्यासाचे नियोजन, नियमित अध्ययनाचे महत्त्व तसेच वर्षभर सातत्याने तयारी करून नीट, जेईई आणि सीईटीसारख्या स्पर्धा परीक्षांमध्ये यश मिळविण्यासाठी आवश्यक बाबींचे मार्गदर्शन केले.
नवीन विद्यार्थ्यांमध्ये आत्मविश्वास निर्माण व्हावा आणि महाविद्यालयीन जीवनाची सुरुवात आनंददायी वातावरणात व्हावी, या उद्देशाने स्वागत समारंभाचे आयोजन करण्यात आले होते. कार्यक्रमाचे नियोजन महाविद्यालयातील सर्व शिक्षक व शिक्षकेतर कर्मचाऱ्यांनी केले.
संस्थेच्या अध्यक्षा निर्मला जाधव यांनी विद्यार्थ्यांना नवीन शैक्षणिक वर्षाच्या शुभेच्छा दिल्या. शालेय जीवनातून महाविद्यालयीन जीवनात प्रवेश करताना विद्यार्थ्यांनी वेळेचे योग्य नियोजन, नियमित अभ्यास आणि शिस्त यांना प्राधान्य द्यावे, असे आवाहन त्यांनी केले. तसेच नीट, जेईई, सीईटीसह विविध स्पर्धा परीक्षांसाठी सुरुवातीपासूनच नियोजनबद्ध तयारी करण्याचा सल्ला देत महाविद्यालय विद्यार्थ्यांच्या सर्वांगीण प्रगतीसाठी कटिबद्ध असल्याचे त्यांनी सांगितले.
