काशिनाथ शिंदे :शिवसेना (उद्धव बाळासाहेब ठाकरे) गटातून शिंदे गटात प्रवेश केलेले खासदार संजय दिना पाटील यांनी पत्रकारांविषयी कथितरीत्या केलेल्या अवमानकारक व धमकीवजा वक्तव्याच्या निषेधार्थ महाराष्ट्र नवनिर्माण सेनेच्या वतीने शुक्रवारी पिंपरी-चिंचवड पोलीस आयुक्त विनयकुमार चोबे यांना निवेदन देऊन तात्काळ कायदेशीर कारवाईची मागणी करण्यात आली.
मनसे शहराध्यक्ष सचिन चिखले यांनी दिलेल्या निवेदनात, लोकशाहीचा चौथा स्तंभ असलेल्या प्रसारमाध्यमांविषयी अश्लाघ्य भाषा वापरणे तसेच पत्रकारांना जीवे मारण्याची धमकी देणे हा अत्यंत गंभीर प्रकार असून, अशा वक्तव्यामुळे पत्रकारांमध्ये भीतीचे वातावरण निर्माण होऊ शकते, असे नमूद करण्यात आले आहे.
या प्रकरणात संबंधित खासदारांवर भारतीय न्याय संहितेच्या (BNS) संबंधित कलमान्वये तातडीने गुन्हा दाखल करून कठोर कायदेशीर कारवाई करावी, अशी मागणी मनसेने केली आहे. पत्रकारांचा आवाज दाबण्याचा कोणताही प्रयत्न सहन केला जाणार नाही, असा इशाराही निवेदनातून देण्यात आला.
यावेळी मनसेचे उपविभाग अध्यक्ष निलेश नेटके, संतोष यादव, सागर बहुले, नारायण पठारे, जॉकी सबेस्टीन, प्रशांत चनाल आणि वैभव फाळके आदी पदाधिकारी व कार्यकर्ते उपस्थित होते.
मनसेने या घटनेचा तीव्र निषेध व्यक्त करत पत्रकारांच्या अभिव्यक्ती स्वातंत्र्याचे संरक्षण करण्यासाठी प्रशासनाने तातडीने हस्तक्षेप करावा, अशी मागणी केली आहे.
About the Author
