पुणे RTO ची अपघातांवर लगाम घालण्यासाठी मोठी मोहीम; ८ विशेष पथके रस्त्यावर उतरली!

काशिनाथ शिंदे :शहरातील वाढत्या रस्ते अपघातांवर नियंत्रण मिळवण्यासाठी पुणे प्रादेशिक परिवहन विभागाने (RTO) विशेष मोहीम सुरू केली आहे. या मोहिमेअंतर्गत शहरभर ८ स्वतंत्र पथके नियुक्त करण्यात आली असून, ही पथके विविध भागांत नियमित तपासणी करून वाहतूक नियमांची प्रभावी अंमलबजावणी करणार आहेत.

शहरातील वाढती वाहतूक कोंडी, बेदरकार वाहनचालक आणि वाहतूक नियमांचे उल्लंघन यामुळे अपघातांचे प्रमाण वाढत असल्याच्या पार्श्वभूमीवर ही मोहीम हाती घेण्यात आली आहे. विशेष पथकांना नियमभंग करणाऱ्यांवर कठोर कारवाई करण्याचे आदेश देण्यात आले आहेत.

या मोहिमेदरम्यान ओव्हरस्पीडिंग, विना हेल्मेट दुचाकी चालविणे, धोकादायक पद्धतीने वाहन चालविणे तसेच इतर वाहतूक नियमांचे उल्लंघन करणाऱ्या चालकांवर कडक कारवाई करण्यात येणार आहे. तसेच वाहनचालकांमध्ये वाहतूक नियमांबाबत जनजागृतीही केली जाणार आहे.

RTO प्रशासनाने नागरिकांना वाहतूक नियमांचे काटेकोर पालन करून सुरक्षित प्रवास करण्याचे आवाहन केले आहे.