DakshTimes News Network
काशिनाथ शिंदे
पिंपरी-चिंचवड पोलीस आयुक्तालयाच्या दारूबंदी पथकाने अवैध शस्त्रांविरोधातील विशेष मोहिमेत उल्लेखनीय कामगिरी करत रेकॉर्डवरील एका आरोपीला चिखली परिसरातून देशी पिस्तूल व जिवंत काडतुसासह अटक केली. या कारवाईत सुमारे 51 हजार रुपयांचा मुद्देमाल जप्त करण्यात आला आहे.
पोलीस निरीक्षक भास्कर पुल्ली यांच्या मार्गदर्शनाखाली सहाय्यक पोलीस निरीक्षक मोरे, सहाय्यक पोलीस फौजदार पलांडे तसेच पोलीस हवालदार पवार, सूर्यवंशी, चव्हाण, पोलीस नाईक गोनटे आणि पोलीस शिपाई खेडकर, पतंगे, देवकर, यादव व पाटील हे अवैध धंदे आणि बेकायदा शस्त्र बाळगणाऱ्या इसमांची माहिती घेत पेट्रोलिंग करत होते.
यावेळी पोलीस शिपाई खेडकर व पोलीस नाईक गोनटे यांना मिळालेल्या गोपनीय माहितीच्या आधारे चिखली परिसरातील जाधववाडी ते जाधव सरकार चौकाकडे जाणाऱ्या रस्त्यालगत महानगरपालिकेच्या मोकळ्या जागेजवळ सापळा रचण्यात आला. कारवाईदरम्यान संशयित शिवाजी दुर्गेश कुंचिकर (वय 20, रा. शिवाजीनगर, मरीमाता मंदिराजवळ, देहूरोड, ता. हवेली, जि. पुणे) याला ताब्यात घेण्यात आले.
त्याच्या झडतीत एक देशी पिस्तूल आणि एक जिवंत काडतूस आढळून आले. पोलिसांनी 50 हजार रुपये किमतीचे पिस्तूल आणि 1 हजार रुपये किमतीचे जिवंत काडतूस असा एकूण 51 हजार रुपयांचा मुद्देमाल जप्त केला.
याप्रकरणी चिखली पोलीस ठाण्यात गुन्हा क्रमांक 447/2026 नोंद करण्यात आला असून आरोपीविरुद्ध आर्म्स ॲक्ट कलम 3(25) तसेच महाराष्ट्र पोलीस अधिनियम कलम 37(1)(3) सह 135 अन्वये गुन्हा दाखल करण्यात आला आहे.
अवैध शस्त्रांविरोधात सातत्याने सुरू असलेल्या मोहिमेत दारूबंदी पथकाने केलेल्या या धडाकेबाज कारवाईचे पोलीस दलात आणि नागरिकांतून कौतुक होत आहे.
