DakshTimes News Network
काशिनाथ शिंदे आळंदी,
पिंपरी-चिंचवड पोलीस आयुक्तालयाच्या गुन्हे शाखा युनिट-3 ने अंमली पदार्थांविरोधातील मोहिमेत आणखी एक उल्लेखनीय कारवाई करत आळंदी पोलीस ठाण्याच्या हद्दीत 337 ग्रॅम गांजासह दोन आरोपींना ताब्यात घेतले. या कारवाईत स्कुटीसह एकूण 76 हजार 850 रुपयांचा मुद्देमाल जप्त करण्यात आला आहे.
गुन्हे शाखा युनिट-3 चे वरिष्ठ पोलीस निरीक्षक संतोष कसबे यांच्या मार्गदर्शनाखाली पोलीस उपनिरीक्षक सुनील जावळे, पोलीस हवालदार श्रीधन इचके, पोलीस अंमलदार निखिल फापाळे, बाळासाहेब भांगले, सुंदर थोरात आणि तुषार वराडे हे पेट्रोलिंग करत असताना पोलीस हवालदार श्रीधन इचके व पोलीस शिपाई निखिल फापाळे यांना मिळालेल्या गोपनीय माहितीच्या आधारे आळंदी घाट परिसरात सापळा रचण्यात आला.
यावेळी दोन संशयितांना ताब्यात घेऊन त्यांची झडती घेतली असता त्यांच्या ताब्यात 337 ग्रॅम गांजा आढळून आला. त्यानंतर दोघांविरुद्ध एनडीपीएस कायद्यानुसार कलम 8(क), 20(ब)(ii)(अ) अंतर्गत गुन्हा दाखल करण्यात आला.
अटक करण्यात आलेल्या आरोपींची नावे विनयदिप गंगाधर मानवते (वय 29, रा. चिंबळी, ता. खेड) आणि इस्माईल मगबुल पठाण (वय 25, रा. गायकवाड वस्ती, कुरुळी, ता. खेड) अशी आहेत. तसेच या प्रकरणात मनीष (पूर्ण नाव व पत्ता निष्पन्न करावयाचा) हा फरार आरोपी असून त्याचा पोलीस शोध घेत आहेत.
या कारवाईत 16 हजार 850 रुपयांचा 337 ग्रॅम गांजा आणि 60 हजार रुपयांची स्कुटी असा एकूण 76 हजार 850 रुपयांचा मुद्देमाल जप्त करण्यात आला आहे.
या प्रकरणाचा पुढील तपास आळंदी पोलीस ठाण्याचे तपासी अंमलदार करीत आहेत. अंमली पदार्थांच्या अवैध तस्करीविरोधात गुन्हे शाखा युनिट-3 ने केलेल्या या धडाकेबाज कारवाईचे सर्व स्तरांतून कौतुक होत आहे.
