DakshTimes News Network
काशिनाथ शिंदे :पिंपरी-चिंचवड गुन्हे शाखा युनिट-२ ने सराईत गुन्हेगाराविरुद्ध मोठी कारवाई करत तीन देशी बनावटीची पिस्तुले आणि दोन जिवंत काडतुसे जप्त केली आहेत. या कारवाईत रेकॉर्डवरील आरोपी ओंकार सचिन मोरे (वय २३) याला अटक करण्यात आली असून त्याच्याविरुद्ध महाराष्ट्र पोलीस अधिनियम कलम ३(२५) सह १३५ अन्वये गुन्हा दाखल करण्यात आला आहे.
पोलीस आयुक्त विनयकुमार चौबे यांच्या आदेशानुसार शहरात अवैध शस्त्रांविरोधात विशेष मोहीम राबविण्यात येत आहे. त्याच मोहिमेदरम्यान गुन्हे शाखा युनिट-२ ला मिळालेल्या गोपनीय माहितीच्या आधारे सापळा रचून आरोपीला ताब्यात घेण्यात आले.
आरोपीकडून तीन देशी पिस्तुले व दोन जिवंत काडतुसे असा शस्त्रसाठा जप्त करण्यात आला. प्राथमिक चौकशीत आरोपी हा रेकॉर्डवरील गुन्हेगार असल्याचे निष्पन्न झाले असून त्याच्यावर यापूर्वीही खूनाचा प्रयत्न, मारामारी, बेकायदेशीर शस्त्र बाळगणे आदी गंभीर स्वरूपाचे अनेक गुन्हे दाखल असल्याची माहिती पोलिसांनी दिली.
ही कारवाई पोलीस उपायुक्त (गुन्हे) रोहितस पवार यांच्या मार्गदर्शनाखाली, गुन्हे शाखा युनिट-२ चे वरिष्ठ पोलीस निरीक्षक अरविंद पवार तसेच त्यांच्या पथकाने यशस्वीरीत्या पार पाडली.
अवैध शस्त्र बाळगणाऱ्यांविरोधातील ही मोहीम पुढेही सुरू राहणार असून शहरातील गुन्हेगारीला आळा घालण्यासाठी कठोर कारवाई करण्यात येणार असल्याचे पोलिसांनी स्पष्ट केले आहे.
