DakshTimes News Network
काशिनाथ शिंदे :थेरगाव परिसरात बेकायदा गावठी पिस्तूल आणि जिवंत काडतूस बाळगणाऱ्या १८ वर्षीय तरुणाला काळेवाडी पोलिसांनी अटक करून त्याच्याविरोधात शस्त्र अधिनियमांतर्गत गुन्हा दाखल केला आहे. ही कारवाई २५ जून रोजी पहाटे सुमारे १.३० वाजता रॉयल बॅन्क्वेट हॉलसमोरील पवना नदीकडे जाणाऱ्या रस्त्यावर करण्यात आली.
पोलिसांनी दिलेल्या माहितीनुसार, सोमीन अमिरखान (वय १८, रा. भोरडेनगर, थेरगाव) याच्याकडून एक गावठी पिस्तूल आणि एक जिवंत काडतूस जप्त करण्यात आले. जप्त करण्यात आलेल्या पिस्तुलावर कोणतेही उत्पादकाचे नाव, क्रमांक किंवा ओळख पटविणारे चिन्ह नसल्याचे प्राथमिक तपासात निष्पन्न झाले आहे.
याप्रकरणी पोलीस शिपाई अजय अरुण फल्ले यांनी काळेवाडी पोलीस ठाण्यात फिर्याद दिली आहे. आरोपीविरुद्ध भारतीय शस्त्र अधिनियम, १९५९ मधील संबंधित कलमांसह महाराष्ट्र पोलीस अधिनियम कलम ३७(१)/१३५ अन्वये गुन्हा दाखल करण्यात आला आहे.
पिंपरी-चिंचवड पोलीस आयुक्तालयाने लागू केलेल्या शस्त्रबंदी आदेशाचे उल्लंघन करून आरोपी बेकायदा शस्त्र बाळगत असल्याचे पोलिसांनी नमूद केले आहे. या प्रकरणाचा पुढील तपास सहाय्यक पोलीस निरीक्षक गुरव करत आहेत.
काळेवाडी पोलिसांच्या या कारवाईमुळे परिसरातील बेकायदा शस्त्र बाळगणाऱ्यांवर पोलिसांनी कडक कारवाईचा इशारा दिला आहे.
