DakshTimes News Network
काशिनाथ शिंदे
पिंपरी-चिंचवड पोलीस आयुक्तालयाच्या गुन्हे शाखा युनिट-३ ने अवैध धंद्यांविरोधातील मोहिमेत आणखी एक दमदार कामगिरी करत इंद्रायणी नदीकाठी सुरू असलेल्या हातभट्टी दारू निर्मितीच्या अड्ड्यावर धडक कारवाई केली. या कारवाईत तब्बल २,५०० लिटर रसायन नष्ट करण्यात आले असून, अवैध दारू व्यवसायाला मोठा आर्थिक फटका बसला आहे.
दि. २९ जून २०२६ रोजी वरिष्ठ पोलीस निरीक्षक संतोष कसबे यांच्या मार्गदर्शनाखाली पोलीस हवालदार श्रीधन इचके व दिलीप राठोड पोलीस शिपाई निखिल फापाळे हे आळंदी पोलीस ठाण्याच्या हद्दीत गस्त घालत असताना त्यांना गुप्त माहिती मिळाली. त्यानुसार चिंबळी गावातील भूमकर वस्ती परिसरात इंद्रायणी नदीच्या काठी झाडाझुडपांत हातभट्टी दारू तयार करण्यासाठी मोठ्या प्रमाणात रसायन साठवून ठेवण्यात आले होते.
माहितीची खातरजमा करत पोलिसांनी तात्काळ घटनास्थळी धाव घेत छापा टाकला. कारवाईदरम्यान २,५०० लिटर रसायन जप्त करून घटनास्थळीच नष्ट करण्यात आले. या प्रकरणी रोहित प्रताप राठोड (रा. मोई गाव, ता. खेड, जि. पुणे) याच्याविरुद्ध आळंदी पोलीस ठाण्यात महाराष्ट्र दारूबंदी कायद्यान्वये गुन्हा दाखल करण्यात आला आहे.
गुन्हे शाखा युनिट-३ची आणखी एक धडाकेबाज कामगिरी म्हणून या कारवाईचे सर्व स्तरांतून कौतुक होत असून, अवैध धंद्यांविरोधातील पोलिसांचा वचक अधिक मजबूत झाल्याची भावना नागरिकांनी व्यक्त केली आहे. या प्रकरणाचा पुढील तपास आळंदी पोलीस करत आहेत.
