DakshTimes News Network
काशिनाथ शिंदे
पुणे, . २९ जून : नसरापूर येथील अवघ्या तीन वर्षांच्या चिमुरडीवर लैंगिक अत्याचार करून तिची निर्घृण हत्या केल्याप्रकरणी न्यायालयाने आरोपी भीमराव कांबळे याला “मरेपर्यंत फाशी” अशी कठोर शिक्षा सुनावली आहे. या निर्णयामुळे पीडित कुटुंबाला न्याय मिळाल्याची भावना व्यक्त होत असून समाजातील विविध स्तरांतून या निकालाचे स्वागत करण्यात येत आहे.
या अमानुष घटनेने राज्यभर संतापाची लाट उसळली होती. निष्पाप बालिकेवरील अत्याचार आणि त्यानंतर झालेल्या हत्येमुळे नागरिकांनी आरोपीला कठोरात कठोर शिक्षा देण्याची मागणी केली होती. न्यायालयाने सर्व पुरावे आणि साक्षींचा विचार करून आरोपीला मरेपर्यंत फाशीची शिक्षा सुनावल्याने हा निर्णय महिलांवर आणि बालकांवरील अत्याचार करणाऱ्यांसाठी कठोर इशारा मानला जात आहे.
महिला व बालकांवरील वाढत्या अत्याचारांच्या पार्श्वभूमीवर अशा गुन्ह्यांमध्ये जलदगतीने न्याय मिळणे आणि दोषींना कठोर शिक्षा होणे आवश्यक असल्याचे मत कायदेतज्ज्ञ आणि सामाजिक कार्यकर्त्यांकडून व्यक्त केले जात आहे.
दरम्यान, महिला आणि बालकांची सुरक्षितता ही केवळ प्रशासनाची नव्हे, तर संपूर्ण समाजाची सामूहिक जबाबदारी असल्याचे अधोरेखित होत आहे. अशा घटना पुन्हा घडू नयेत यासाठी कठोर कायद्यांची प्रभावी अंमलबजावणी, जलद न्यायप्रक्रिया आणि सामाजिक जागरूकता यांना अधिक बळ देण्याची गरज व्यक्त केली जात आहे.
