DakshTimes News Networkपिंपरी-चिंचवड, दि. १५ जून : शहरातील चिंचवड परिसरातील चेतना हॉस्पिटलमध्ये महिला रुग्णाचा विनयभंग झाल्याची धक्कादायक घटना उघडकीस आली आहे. मणक्याच्या शस्त्रक्रियेनंतर तपासणीच्या बहाण्याने एका ३७ वर्षीय महिला रुग्णाशी अश्लील वर्तन केल्याप्रकरणी निगडी पोलिसांनी डॉक्टरला अटक केली आहे.
पोलिसांनी दिलेल्या माहितीनुसार, डॉ. धैर्यशील शेटक (वय २७, मूळ रा. कोल्हापूर) असे अटक करण्यात आलेल्या डॉक्टरचे नाव आहे. संबंधित महिला ८ जून रोजी मणक्याच्या शस्त्रक्रियेसाठी चेतना हॉस्पिटलमध्ये दाखल झाली होती. ११ जून रोजी तिच्यावर यशस्वी शस्त्रक्रिया करण्यात आली होती.
रविवारी (दि. १४ जून) शस्त्रक्रियेनंतर उपचार सुरू असताना आरोपी डॉक्टरने जनरल वॉर्डमध्ये तपासणीच्या निमित्ताने महिलेजवळ जाऊन तिच्याशी अश्लील चाळे केल्याचा आरोप आहे. या प्रकारामुळे घाबरलेल्या महिलेने तात्काळ ही बाब आपल्या कुटुंबीयांच्या निदर्शनास आणून दिली.
घटनेची माहिती मिळताच कुटुंबीयांनी हॉस्पिटलमध्ये संताप व्यक्त केला. त्यानंतर निगडी पोलिसांना कळविण्यात आले. पोलिसांनी तातडीने घटनास्थळी धाव घेत आरोपी डॉक्टरला ताब्यात घेतले. महिलेच्या तक्रारीवरून डॉक्टरविरोधात विनयभंगाचा गुन्हा दाखल करण्यात आला असून त्याला अटक करण्यात आली आहे.
