DakshTimes News Network
काशिनाथ शिंदे : लोणावळा
लोहगड किल्ल्यावर फिरण्यासाठी गेलेल्या तरुणाचा मृत्यू अपघाती नसून तो पूर्वनियोजित खून असल्याचे उघडकीस आले आहे. प्रेमसंबंधातील अडथळा दूर करण्यासाठी प्रेयसी आणि तिच्या प्रियकराने मित्राच्या मदतीने तरुणाला किल्ल्यावरील दरीत ढकलून ठार मारल्याचे तपासात निष्पन्न झाले. या प्रकरणी पुणे ग्रामीण पोलिसांच्या स्थानिक गुन्हे शाखा आणि लोणावळा ग्रामीण पोलिसांनी तिघांना अटक केली आहे.
लोणावळा ग्रामीण पोलिस ठाण्यात १८ जून रोजी लोहगड किल्ल्याच्या पश्चिम बाजूस दरीत पडून केतन विशाल आगरवाल (वय २५, रा. लोढा बेलमोंडो टॉवर, मावळ) याचा मृत्यू झाल्याची नोंद अपघाती मृत्यू म्हणून करण्यात आली होती. मात्र मृताची होणारी पत्नी सिया गोयल यांनी दिलेल्या माहितीतून संशय निर्माण झाल्याने पोलिसांनी सखोल तपास सुरू केला.
पोलिस अधीक्षक संदीप सिंह गिल यांनी स्वतः या प्रकरणाची माहिती घेऊन समांतर तपासाचे आदेश दिले. स्थानिक गुन्हे शाखेच्या दोन विशेष पथकांची नियुक्ती करण्यात आली. तपासादरम्यान सिया गोयल हिचे चेतन चौधरी याच्यासोबत प्रेमसंबंध असल्याचे समोर आले. सिया गोयलचा विवाह केतन आगरवाल याच्याशी झाल्यानंतरही हे संबंध कायम होते.
तपासात उघड झाले की, केतन आगरवाल हा त्यांच्या प्रेमसंबंधांमध्ये अडथळा ठरत असल्याने सिया गोयल, चेतन चौधरी आणि त्यांचा मित्र प्रियांकर यांनी कट रचला. त्यानुसार चेतन आगरवाल याला लोहगड किल्ल्यावर फिरण्यासाठी नेण्यात आले आणि संधी साधून त्याला दरीत ढकलून देण्यात आले. त्यात त्याचा मृत्यू झाला.
या प्रकरणी लोणावळा ग्रामीण पोलिसांनी खुनाचा गुन्हा दाखल करून आरोपी चेतन बाबूलाल चौधरी (वय २२, रा. पार्थनगर, बी-४/३०२, कोंढवा बुद्रुक, पुणे) याला अटक केली. तसेच सिया प्रविण गोयल (वय २०, रा. लिलाकुंज, न्यू एरा सोसायटी, गंगाधाम समोर, कोंढवा रोड, पुणे) हिलाही ताब्यात घेण्यात आले आहे. गुन्ह्यातील तिसऱ्या साथीदारालाही अटक करण्यात आली आहे.
ही कारवाई पोलिस अधीक्षक संदीप सिंह गिल, अपर पोलिस अधीक्षक शुभम कुमार, उपविभागीय पोलिस अधिकारी गजानन टोपे आणि पोलिस उपअधीक्षक (गृह) राजेंद्र माने यांच्या मार्गदर्शनाखाली स्थानिक गुन्हे शाखेचे पोलिस निरीक्षक प्रमोद क्षीरसागर व त्यांच्या पथकाने केली. पुढील तपास लोणावळा ग्रामीण पोलिस करत आहेत.
