DakshTimes News Network
Kashinath Shinde:
प्रेमसंबंधाच्या कारणावरून झालेल्या वादातून थेरगाव परिसरात दोन तरुणांवर चाकू आणि चॉपरने जीवघेणा हल्ला करण्यात आल्याची धक्कादायक घटना घडली आहे. या हल्ल्यात एका तरुणाचा मृत्यू झाला असून दुसरा जखमी झाला आहे. याप्रकरणी काळेवाडी पोलिस ठाण्यात खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, ७ मे २०२६ रोजी सुमारे ११ वाजण्याच्या सुमारास थेरगाव येथील शिवशंकर कॉलनी आणि बालाजी कॉलनी परिसरातील मुख्य रस्त्यावर ही घटना घडली. सुभान हमीद शेख (वय १९, रा. गुलमोहर कॉलनी, पुणे) याचा हल्ल्यात मृत्यू झाला, तर अफद रमजान शेख (वय २२, रा. शिवशंभो कॉलनी, थेरगाव) हा गंभीर जखमी झाला आहे.
तक्रारदार हमीद नजीर शेख यांनी दिलेल्या फिर्यादीनुसार, सुभान आणि सपना नावाच्या युवतीमध्ये प्रेमसंबंध होते. या संबंधांना युवतीची आई जयश्री कदम यांचा विरोध होता. त्यातून निर्माण झालेल्या वादामुळे जयश्री कदम यांचा प्रियकर विशाल सूर्यवंशी आणि त्याचा साथीदार अनिकेत सूर्यवंशी यांनी सुभान व त्याच्या मित्रावर चाकू व चॉपरने हल्ला केला.
हल्ल्यात सुभानच्या हात, पोट आणि मानेवर वार करण्यात आले, तर अफद शेख यालाही हात व पोटावर गंभीर दुखापती झाल्या. जखमींना तातडीने उपचारासाठी रुग्णालयात करण्यात आले; मात्र सुभानचा उपचारादरम्यान मृत्यू झाला.
या प्रकरणी विशाल सूर्यवंशी आणि अनिकेत सूर्यवंशी या दोघांविरुद्ध भारतीय न्याय संहिता अंतर्गत खून व इतर गंभीर कलमांनुसार गुन्हा दाखल करण्यात आला असून काळेवाडी पोलीस अधिक तपास करत आहेत.
