काशिनाथ शिंदे पुणे, : कात्रज परिसरात वाहतूक नियमांचे उल्लंघन करणाऱ्या दुचाकीस्वारावर कारवाई करण्यासाठी थांबवलेल्या पोलीस कर्मचाऱ्यावर हेल्मेटने हल्ला करून ई-चलन मशीन व मोबाईलची तोडफोड केल्याची धक्कादायक घटना समोर आली आहे. या प्रकरणी आंबेगाव पोलीस ठाण्यात गुन्हा दाखल करण्यात आला असून आरोपीविरुद्ध पुढील तपास सुरू आहे.
पोलिसांनी दिलेल्या माहितीनुसार, १८ जून २०२६ रोजी सायंकाळी साडेसहा वाजण्याच्या सुमारास कात्रज येथील नवीन पीएमटी बसथांब्याजवळ ही घटना घडली. भारती विद्यापीठ वाहतूक विभागातील पोलीस कर्मचारी वाहतूक नियमनाचे कर्तव्य बजावत असताना वडगाव बुद्रुक येथील सदानंद कोंडिबा साळुंखे (वय ४५) हा दुचाकी भरधाव व निष्काळजीपणे चालवत असल्याचे निदर्शनास आले.
यावेळी संबंधित दुचाकीस्वाराला थांबवून वाहतूक नियमभंगाबाबत कारवाई सुरू केली असता त्याने संतापाच्या भरात पोलीस कर्मचाऱ्याशी हुज्जत घातली. त्यानंतर हेल्मेटने हल्ला करत शासकीय कामात अडथळा निर्माण केला. तसेच ई-चलन मशीन आणि मोबाईलची तोडफोड करून नुकसान केल्याचे तक्रारीत नमूद करण्यात आले आहे.
या घटनेमुळे काही काळ परिसरात तणावाचे वातावरण निर्माण झाले. पोलीस कर्मचाऱ्यांवर होणारे हल्ले आणि शासकीय कामात होणारा हस्तक्षेप ही चिंतेची बाब असून, अशा प्रकारच्या घटनांमुळे कायदा व सुव्यवस्थेच्या प्रश्नांवर पुन्हा एकदा चर्चा सुरू झाली आहे.
About the Author
