पुणे : भारत सरकारच्या सांख्यिकी आणि कार्यक्रम अंमलबजावणी मंत्रालयांतर्गत कार्यरत राष्ट्रीय सांख्यिकी कार्यालयाच्या क्षेत्रीय कार्य संचालनालय, पुणे प्रादेशिक कार्यालयातर्फे राष्ट्रीय नमुना सर्वेक्षणाच्या (एनएसएस) ८१ व्या फेरीसाठी चार दिवसीय प्रादेशिक प्रशिक्षण शिबिरास मंगळवारपासून प्रारंभ झाला. १६ ते १९ जूनदरम्यान आयोजित या शिबिरात स्थलांतर विषयक सर्वेक्षण, अखिल भारतीय कर्ज व गुंतवणूक सर्वेक्षण तसेच कृषी कुटुंबांच्या स्थिती मूल्यांकन सर्वेक्षणाबाबत प्रशिक्षण दिले जाणार आहे.
प्रशिक्षण शिबिराचे उद्घाटन प्रादेशिक कार्यालयाच्या संयुक्त संचालक डॉ. रुही कुलकर्णी, प्रादेशिक संयुक्त आयुक्त सुषमा जाधव आणि अन्य मान्यवरांच्या हस्ते दीपप्रज्वलनाने झाले.
यावेळी बोलताना डॉ. कुलकर्णी यांनी पुराव्यांवर आधारित धोरणनिर्मितीसाठी अचूक व गुणवत्तापूर्ण माहिती संकलनाचे महत्त्व अधोरेखित केले. सर्वेक्षणाची रूपरेषा, माहिती संकलन पद्धती, क्षेत्रीय कार्यपद्धती आणि सांख्यिकीय मानकांचे काटेकोर पालन यावर प्रशिक्षणात भर दिला जाणार असल्याचे त्यांनी सांगितले.
सुषमा जाधव यांनी ग्रामीण व शहरी भागातून संकलित होणारी माहिती राष्ट्रीय धोरणे आणि लोककल्याणकारी योजनांसाठी अत्यंत महत्त्वाची असल्याचे नमूद केले. सहाय्यक संचालक वेदांत कोंडकर यांनी या सर्वेक्षणांमुळे देशाच्या सामाजिक-आर्थिक परिस्थितीचे वास्तव चित्र समोर येत असल्याचे सांगितले.
१ जुलैपासून सुरू होणाऱ्या क्षेत्रीय कामकाजाच्या पार्श्वभूमीवर हे प्रशिक्षण आयोजित करण्यात आले आहे. या सर्वेक्षणांतून कुटुंबांची मालमत्ता, कर्जे, गुंतवणूक, कृषी उत्पन्न, शेती पद्धती, स्थलांतराची कारणे, रोजगारस्थिती आणि सामाजिक-आर्थिक परिणाम याबाबतची विश्वासार्ह माहिती संकलित केली जाणार आहे.
सर्वेक्षणासाठी कुटुंबांची निवड वैज्ञानिक नमुना पद्धतीने करण्यात येणार असून प्रशिक्षित प्रगणक संगणकीय अनुप्रयोगयुक्त टॅब्लेटच्या साहाय्याने माहिती गोळा करणार आहेत. नागरिकांनी या सर्वेक्षणास सहकार्य करावे, असे आवाहन राष्ट्रीय सांख्यिकी कार्यालयाने केले आहे. संकलित माहिती पूर्णतः गोपनीय ठेवण्यात येणार असल्याचेही स्पष्ट करण्यात आले
About the Author
