DakshTimes News Network
काशिनाथ शिंदे जेजुरी, दि. २२ जून : श्री क्षेत्र जेजुरी येथे पर्जन्य सेवा मोठ्या उत्साहात आणि भक्तिमय वातावरणात संपन्न झाली. “२० टक्के अध्यात्म आणि ८० टक्के समाजसेवा” या संकल्पनेवर आधारित या कार्यक्रमात देशभर चांगला पाऊस पडून भारतभूमी सुजलाम-सुफलाम व्हावी, यासाठी श्री खंडेरायाच्या चरणी विशेष यागांचे आयोजन करण्यात आले.
परमपूज्य गुरूमाऊली, युवासंत चंद्रकांत दादासाहेब, नितिनभाऊ व आबासाहेब यांच्या आशीर्वादाने तसेच पुणे जिल्हा प्रेरणास्थान सतिशदादा मोटे आणि गुरुकन्या पल्लवीताई मोटे यांच्या प्रमुख उपस्थितीत हा कार्यक्रम पार पडला. यावेळी श्री रुद्र याग, श्री मल्हारी याग आणि पर्जन्य याग मोठ्या श्रद्धाभावाने संपन्न करण्यात आले.
कार्यक्रमास उपस्थित सेवेकऱ्यांना सतिशदादा मोटे यांचे मार्गदर्शन लाभले. पुणे जिल्ह्यासह राहुरी, श्रीगोंदा आणि कोकण विभागातील अनेक सेवेकरी या पर्जन्य सेवेत सहभागी झाले होते. सेवेकऱ्यांच्या मोठ्या प्रतिसादामुळे कार्यालयातील दोन्ही सभागृहे पूर्ण भरली होती. तसेच व्हरांडा आणि वधू-वर कक्षातही उपस्थितांना बसण्याची व्यवस्था करण्यात आली होती.
आयोजकांनी या उपक्रमाला भविष्यात राष्ट्रीय स्वरूप प्राप्त होणार असल्याचा विश्वास व्यक्त केला. दरम्यान, पर्जन्य सेवा संपन्न झाल्यानंतर परतीच्या प्रवासात अनेक सेवेकऱ्यांनी पावसाचा अनुभव घेतल्याने त्यांनी या सेवेबद्दल समाधान व्यक्त केले.
