DakshTimes News Network
‘साक्ष बदलण्यासाठी’ धमकावल्याचा दावा; २० लाखांच्या व्यवहारापासून बंदुकीच्या धाकापर्यंत आरोप
काशिनाथ शिंदे
पिंपरी : तळेगाव दाभाडे येथील जनसेवा विकास समितीचे अध्यक्ष किशोर आवारे यांच्या खून प्रकरणातील साक्षीदारांवर दबाव आणला जात असल्याचे गंभीर आरोप पिंपरी येथे झालेल्या पत्रकार परिषदेत करण्यात आले. साक्ष बदलण्यासाठी धमकावणे, मध्यरात्री घर गाठून दबाव आणणे, बंदुकीचा धाक दाखविणे तसेच पोलिस संरक्षण काढून घेतल्याचे आरोप यावेळी साक्षीदारांकडून करण्यात आले. याचबरोबर किशोर आवारे यांच्या हत्येसाठी २० लाख रुपयांचा व्यवहार झाल्याचा दावाही करण्यात आला.
किशोर आवारे यांची १२ मे २०२३ रोजी तळेगाव नगरपरिषदेसमोर गोळ्या झाडून हत्या करण्यात आली होती. या प्रकरणाचा सत्र खटला क्रमांक ५४/२०२३ वडगाव मावळ येथील अतिरिक्त सत्र न्यायालयात सुरू आहे. तपासादरम्यान संकलित करण्यात आलेले इलेक्ट्रॉनिक पुरावे तसेच प्रत्यक्षदर्शी साक्षीदारांचे जबाब या खटल्याच्या दृष्टीने महत्त्वाचे असल्याचे पत्रकार परिषदेत सांगण्यात आले.
२० लाखांच्या व्यवहाराचा दावा
प्रकरणातील साक्षीदार मोहसीन मुलाणी यांनी हत्येपूर्वी कटाची माहिती मिळाल्याचा आणि त्याबाबत किशोर आवारे यांना सावध केल्याचा दावा केला. तसेच सुधाकर शेळके यांनी आपल्या समक्ष किशोर आवारे यांच्या हत्येसाठी २० लाख रुपये दिल्याचा दावा मुलाणी यांनी केल्याचे सांगण्यात आले.
आपला जबाब बदलण्यासाठी आपल्यावर दबाव आणण्यात आल्याचाही दावा मुलाणी यांनी केल्याचे पत्रकार परिषदेत नमूद करण्यात आले.
प्रत्यक्षदर्शी साक्षीदाराला बंदुकीचा धाक?
आकाश जगताप हे या प्रकरणातील प्रत्यक्षदर्शी साक्षीदार असल्याचे सांगण्यात आले. घटनेच्या वेळी त्यांनी मोबाईलमध्ये व्हिडिओ रेकॉर्डिंग केल्याचा दावाही करण्यात आला.
संदीप गराडे यांनी आपल्याला बोलावून डोक्याला बंदूक लावली आणि साक्ष देऊ नये, अशी धमकी दिल्याचा आरोप आकाश जगताप यांनी केला. उलटतपासणीदरम्यानही साक्ष देऊ नये म्हणून दबाव आणण्यात आल्याचे तसेच बंदुकीचा धाक दाखविण्यात आल्याचे त्यांनी न्यायालयाच्या निदर्शनास आणून दिल्याचा दावा पत्रकार परिषदेत करण्यात आला.
पोलिस संरक्षण काढल्याचा आरोप
साक्षीदार अनिल पवार यांनी आपले पोलिस संरक्षण काढून घेण्यात आल्याचा आरोप केला. राजकीय पदाचा गैरवापर करून आपल्यावर मोक्का कायद्यांतर्गत कारवाई करण्यात आल्याचाही दावा त्यांनी केला.
तसेच संदीप गराडे यांनी दूरध्वनीवरून ‘आमदार, मंत्री होईल, कशाला वादात जाता…’ अशा आशयाचे बोलून धमकावल्याचा आरोप पवार यांनी केला.
अनिल पवार यांच्यावर यापूर्वी मोक्का कायद्यांतर्गत कारवाई झाली होती. विशेष सत्र न्यायालयाने जामीन मंजूर करताना या कारवाईबाबत निरीक्षण नोंदविल्याचा दावा पत्रकार परिषदेत करण्यात आला.
मध्यरात्री घर गाठून धमकी दिल्याचा दावा
दत्तात्रय पारगे यांनीही साक्ष बदलण्यासाठी दबाव आणल्याचा आरोप केल्याचे सांगण्यात आले. जानेवारी २०२६मध्ये काही व्यक्तींनी आपल्याला एका ठिकाणी नेऊन खोटी साक्ष देण्यासाठी दबाव आणला. त्यानंतर ३० मार्च रोजी मध्यरात्री घर गाठून धमकी देण्यात आल्याचा दावाही त्यांनी केल्याचे पत्रकार परिषदेत सांगण्यात आले.
या प्रकारानंतर काही साक्षीदारांना चोवीस तास पोलिस संरक्षण देण्यात आल्याचेही सांगण्यात आले.
मिलिंद अच्युत यांनीदेखील धमकी मिळाल्याचे न्यायालयाच्या निदर्शनास आणून दिल्याचा दावा करण्यात आला. त्यानंतर त्यांना पोलिस संरक्षण देण्यात आल्याचे सांगण्यात आले.
साक्षीदारांच्या सुरक्षेची मागणी
या सर्व आरोपांच्या पार्श्वभूमीवर खटल्यातील महत्त्वाच्या साक्षीदारांच्या सुरक्षेचा प्रश्न पुन्हा ऐरणीवर आला आहे. साक्षीदारांना धमक्या देणाऱ्यांविरुद्ध तातडीने कारवाई करावी, महत्त्वाच्या साक्षीदारांना सातत्याने पोलिस संरक्षण द्यावे आणि त्यांच्या सुरक्षिततेची जबाबदारी निश्चित करावी, अशी मागणी पत्रकार परिषदेत करण्यात आली.
पिंपरी येथे झालेल्या पत्रकार परिषदेला आकाश जगताप, मोहसीन मुलाणी, अनिल पवार, मिलिंद अच्युत, दत्ता पारगे, निलेश पारगे, सुनिल करंडे आदी उपस्थित होते.
न्यायालयीन पडताळणी बाकी
दरम्यान, २० लाख रुपयांच्या व्यवहाराचा दावा, साक्षीदारांना धमकावल्याचे आरोप, पोलिस संरक्षण काढून घेतल्याचा दावा तसेच मोक्का कारवाईबाबत करण्यात आलेले आरोप हे संबंधित व्यक्तींनी केलेले दावे आहेत. या आरोपांची स्वतंत्र न्यायालयीन पडताळणी होणे बाकी असून, संबंधित आरोपींची बाजू आणि न्यायालयाचा अंतिम निष्कर्ष अद्याप समोर आलेला नाही.
या प्रकरणाची उच्च न्यायालयातील पुढील सुनावणी २४ सप्टेंबर २०२६ रोजी, तर वडगाव मावळ येथील सत्र न्यायालयातील पुढील सुनावणी १ ऑक्टोबर २०२६ रोजी होणार असल्याचे पत्रकार परिषदेत सांगण्यात आले.
फोटोओळ : पत्रकार परिषदेत डावीकडून आकाश जगताप, मोहसीन मुलाणी, अनिल पवार, मिलिंद अच्युत, दत्ता पारगे, निलेश पारगे, सुनिल करंडे आदी.
