DakshTimes News Network
चिंचवडमध्ये ९६ वी जयंती उत्साहात; कामगारांच्या हक्कांसाठी संघटितपणे लढण्याचा निर्धार
पिंपरी : माथाडी कामगारांच्या हक्कांसाठी आयुष्यभर संघर्ष करणारे कै. आमदार अण्णासाहेब पाटील यांची ९६ वी जयंती भारतीय जनता माथाडी जनरल कामगार संघ, पुणे जिल्हा यांच्या वतीने चिंचवडमध्ये शुक्रवारी (दि. २५) उत्साहात साजरी करण्यात आली. केएसबी चौकातील अण्णासाहेब पाटील यांच्या पूर्णाकृती पुतळ्याजवळ हा कार्यक्रम झाला.
यावेळी माथाडी कामगारांनी अण्णासाहेब पाटील यांच्या प्रतिमेस पुष्पहार अर्पण करून अभिवादन केले. माथाडी कामगारांना संघटित करून त्यांच्या हक्कांसाठी अण्णासाहेब पाटील यांनी केलेल्या कार्याचे स्मरण करण्यात आले. त्यांच्या विचारांना पुढे नेत कामगारांच्या विविध प्रश्नांसाठी संघटितपणे कार्य करण्याचा निर्धार यावेळी व्यक्त करण्यात आला.
भारतीय जनता माथाडी जनरल कामगार संघाचे पुणे जिल्हाध्यक्ष विजय भोसूरे, पिंपरी-चिंचवड माथाडी मंडळाचे कामगार प्रतिनिधी रामकृष्ण घावटे, टाटा मोटर्स येथील टोळी क्रमांक ४९५ चे मुकादम विलास घोगरे, अजय जैद, अमित माने, सचिन कोकरे, महिंद्रा अँड महिंद्रा येथील मुकादम स्वप्नील सौबले, इंद्रजीत भिसे, सूरज गवस यांच्यासह माथाडी कामगार मोठ्या संख्येने उपस्थित होते.
छायाचित्र ओळ : भारतीय जनता माथाडी जनरल कामगार संघाच्या वतीने कै. अण्णासाहेब पाटील यांच्या पुतळ्यास पुष्पहार अर्पण करून अभिवादन करण्यात आले.
