DakshTimes News Network
नागरिकांच्या जीविताचे संरक्षण करण्याची राष्ट्रवादी काँग्रेसच्या वाहतूक सेलची मागणी
काशिनाथ शिंदे
पिंपरी-चिंचवड : शहरातील विविध सोसायट्यांच्या आवारात भटक्या कुत्र्यांचा वाढता वावर नागरिकांच्या सुरक्षिततेसाठी गंभीर समस्या ठरत आहे. रात्रीच्या वेळी कुत्र्यांचे टोळके नागरिकांच्या अंगावर धावून जाणे, दुचाकीस्वारांचा पाठलाग करणे, लहान मुले व ज्येष्ठ नागरिकांना घाबरवणे तसेच कुत्रे चावण्याच्या घटना घडत असल्याने या समस्येवर तातडीने उपाययोजना कराव्यात, अशी मागणी राष्ट्रवादी काँग्रेस पक्षाच्या वाहतूक सेलचे पिंपरी-चिंचवड शहराध्यक्ष विनोद वरखडे पाटील यांनी केली आहे.
याबाबत त्यांनी महापालिका प्रशासनाला निवेदन दिले आहे. सोसायट्यांच्या आवारात लहान मुले खेळत असताना तसेच नागरिक सकाळ-संध्याकाळ फिरत असताना भटक्या कुत्र्यांपासून धोका निर्माण होत असल्याचे निवेदनात नमूद करण्यात आले आहे. त्यामुळे नागरिकांनी भीतीच्या वातावरणात जगायचे का, असा सवालही उपस्थित करण्यात आला आहे.
महापालिका प्रशासनाने या समस्येकडे केवळ कागदोपत्री कारवाई म्हणून न पाहता प्रत्यक्ष कार्यवाही करावी. वारंवार तक्रारी करूनही समस्या कायम राहत असल्यास नागरिकांमध्ये नाराजी निर्माण होणे स्वाभाविक आहे. त्यामुळे संबंधित विभागाने तातडीने प्रभावी उपाययोजना करण्याची गरज असल्याचे वरखडे पाटील यांनी म्हटले आहे.
निवेदनातील प्रमुख मागण्या :
सोसायटी परिसरातील भटक्या कुत्र्यांचे तातडीने सर्वेक्षण करावे.
कुत्र्यांचे निर्बिजीकरण व लसीकरणासाठी विशेष मोहीम राबवावी.
नागरिकांच्या सुरक्षेला धोका निर्माण करणाऱ्या आक्रमक कुत्र्यांबाबत नियमांनुसार तातडीने कार्यवाही करावी.
सोसायट्यांमध्ये कचरा व अन्नकचरा उघड्यावर पडणार नाही, यासाठी प्रभावी उपाययोजना कराव्यात.
नागरिकांच्या तक्रारींसाठी विशेष हेल्पलाइन व प्रभावी तक्रार नोंदणी व्यवस्था उपलब्ध करावी.
तक्रार प्राप्त झाल्यानंतर संबंधित पथकाने ठराविक कालमर्यादेत घटनास्थळी जाऊन कार्यवाही करावी.
लहान मुले, महिला व ज्येष्ठ नागरिकांच्या सुरक्षिततेला सर्वोच्च प्राधान्य द्यावे.
नागरिकांच्या जीविताशी संबंधित या प्रश्नाकडे प्रशासनाने गांभीर्याने पाहून केवळ आश्वासने न देता प्रत्यक्ष कारवाई करावी आणि केलेल्या कार्यवाहीचा अहवाल संबंधित नागरिकांना द्यावा, अशी मागणी निवेदनातून करण्यात आली आहे.
समस्या तातडीने सोडविण्यात आली नाही तर नागरिकांच्या वतीने लोकशाही मार्गाने आंदोलन, निवेदन आणि संबंधित वरिष्ठ अधिकाऱ्यांकडे पाठपुरावा करण्याचा मार्ग स्वीकारावा लागेल, असा इशाराही देण्यात आला आहे. नागरिकांच्या सुरक्षिततेशी तडजोड केली जाणार नाही, असे वरखडे पाटील यांनी स्पष्ट केले.
निवेदन देतेवेळी प्राईम पेस्ट कंट्रोलचे मालक संतोष मायने उपस्थित होते.
