DakshTimes News Network
गुन्हे शाखा युनिट ३ ची कारवाई; पाहिजे आरोपी यादीतील आरोपी रामनगर, निगडीतून ताब्यात
काशिनाथ शिंदे
पिंपरी : खुनाच्या प्रयत्नाच्या गंभीर गुन्ह्यात गेल्या वर्षभरापासून पाहिजे असलेल्या आरोपीला गुन्हे शाखा युनिट ३च्या पथकाने रामनगर, निगडी येथून ताब्यात घेतले. करण उर्फ नाना रवी झोंबाडे (वय २२, रा. भीमशक्तीनगर, चिखली, पुणे) असे ताब्यात घेतलेल्या आरोपीचे नाव आहे. तो पाहिजे आरोपी यादी क्रमांक २१६२ मध्ये होता.
दिनांक ५ ऑक्टोबर २०२६ रोजी पोलीस उपनिरीक्षक जावळे, पोलीस हवालदार बि. व्हि. गर्जे, पोलीस अंमलदार दिलीप राठोड आणि पोलीस शिपाई खेडकर यांना खास बातमीदारामार्फत आरोपीबाबत माहिती मिळाली. चिखली पोलीस ठाण्याच्या हद्दीत खुनाचा प्रयत्न केल्यानंतर आरोपी फरार झाला होता. आपले अस्तित्व लपवून तो रामनगर, निगडी येथे राहत असल्याची खात्रीशीर माहिती मिळाल्यानंतर पथकाने कारवाई करत त्याला ताब्यात घेतले.
आरोपीविरुद्ध चिखली पोलीस ठाणे गुन्हा रजिस्टर क्रमांक २८८/२०२५, भारतीय न्याय संहिता कलम १०९(१), ११८(१), ११५(२), ३५२, ३(५) अन्वये गुन्हा दाखल आहे.
ताब्यात घेतलेल्या आरोपीची वैद्यकीय तपासणी करण्यात आली असून, त्यास अहवालासह पुढील कारवाईसाठी चिखली पोलीस ठाण्याच्या ताब्यात देण्यात आले आहे.
ही कारवाई गुन्हे शाखा युनिट ३चे वरिष्ठ पोलीस निरीक्षक संतोष कसबे यांच्या मार्गदर्शनाखाली करण्यात आली.
