वायसीएम रुग्णालयात रक्तदानाचा सेवाभावी संकल्प; १०४ जणांचे रक्तदान!

सेवा संकल्प अभियानाला नागरिकांचा उत्स्फूर्त प्रतिसाद; १९५ जणांची नोंदणी, ८५ पुरुषांसह १९ महिलांचा सहभाग

काशिनाथ शिंदे

पिंपरी : पिंपरी-चिंचवड महानगरपालिका आणि वायसीएम रुग्णालय यांच्या संयुक्त विद्यमाने राबविण्यात आलेल्या ‘सेवा संकल्प अभियानांतर्गत’ आयोजित रक्तदान शिबिराला नागरिकांचा उत्स्फूर्त प्रतिसाद मिळाला. वायसीएम रुग्णालयातील चाणक्य सभागृहात झालेल्या या शिबिरात एकूण १९५ जणांनी नोंदणी केली, तर १०४ नागरिकांनी प्रत्यक्ष रक्तदान करून रुग्णसेवेसाठी मोलाचे योगदान दिले. यामध्ये ८५ पुरुष आणि १९ महिला रक्तदात्यांचा समावेश होता.

महापालिकेचे मुख्य आरोग्य वैद्यकीय अधिकारी डॉ. लक्ष्मण गोफणे आणि अतिरिक्त आरोग्य वैद्यकीय अधिकारी डॉ. अभयचंद्र दादेवार यांच्या मार्गदर्शनाखाली या शिबिराचे आयोजन करण्यात आले. सहाय्यक आरोग्य वैद्यकीय अधिकारी डॉ. अंजली ढोणे, ज्येष्ठ वैद्यकीय अधिकारी डॉ. शैलजा भवसार आणि नोडल वैद्यकीय अधिकारी डॉ. छाया शिंदे यांच्या प्रमुख उपस्थितीत शिबिर पार पडले.

रक्तदानातून रुग्णसेवेला बळ

रक्तदान हे गरजू रुग्णांचे प्राण वाचविण्यासाठी महत्त्वाचे माध्यम आहे. रुग्णालयांमध्ये उपचार घेणाऱ्या रुग्णांना गरजेच्या वेळी सुरक्षित रक्त उपलब्ध व्हावे आणि नागरिकांमध्ये नियमित रक्तदानाविषयी जागरूकता निर्माण व्हावी, या उद्देशाने अशा उपक्रमांचे आयोजन करण्यात येत आहे. ‘सेवा संकल्प अभियान’ सामाजिक बांधिलकी जपत आरोग्यविषयक उपक्रमांमध्ये नागरिकांचा सहभाग वाढविण्यासाठी महत्त्वपूर्ण ठरत आहे.

वैद्यकीय पथकाचे विशेष योगदान

या शिबिराच्या यशस्वितेसाठी महापालिकेच्या कुटुंबकल्याण विभागासह वायसीएम रुग्णालयाच्या रक्तपेढी विभागाने विशेष सहकार्य केले. रक्तपेढीच्या वैद्यकीय अधिकारी डॉ. नीता तायडे आणि डॉ. हर्षदा बाविस्कर यांनी शिबिराच्या नियोजनात आणि अंमलबजावणीत मोलाचे योगदान दिले. वैद्यकीय अधिकारी, कर्मचारी आणि सहकार्य करणाऱ्या सर्वांच्या प्रयत्नांमुळे शिबिर यशस्वी झाले.

नियमित रक्तदानासाठी महापालिकेचे आवाहन

पिंपरी-चिंचवड महानगरपालिकेच्या वतीने नागरिकांना रक्तदानासह विविध आरोग्यविषयक उपक्रमांमध्ये सक्रिय सहभाग घेण्याचे आवाहन करण्यात आले आहे. नागरिकांच्या सहभागातून आरोग्यविषयक जनजागृती वाढण्यासह निरोगी समाजाच्या निर्मितीलाही हातभार लागेल, असा विश्वास महापालिकेच्या वैद्यकीय विभागाने व्यक्त केला.

चौकट : रक्तदानासाठी नागरिकांनी पुढाकार घ्यावा!

“रक्तदान हे सामाजिक बांधिलकी जपण्याचे आणि गरजू रुग्णांना मदत करण्याचे प्रभावी माध्यम आहे. नागरिकांनी नियमित रक्तदानासाठी पुढाकार घ्यावा आणि अशा आरोग्यविषयक उपक्रमांमध्ये सक्रिय सहभाग नोंदवावा. पिंपरी-चिंचवड महानगरपालिकेच्या वतीने नियमितपणे मोफत आरोग्य तपासणी आणि रक्तदान शिबिरांचे आयोजन केले जाते. नागरिकांनी या शिबिरांचा जास्तीत जास्त लाभ घ्यावा.”

— डॉ. लक्ष्मण गोफणे, मुख्य आरोग्य वैद्यकीय अधिकारी, पिंपरी-चिंचवड महानगरपालिका.