कोजागिरीच्या आनंदासोबत पर्यावरण संवर्धनाचा संदेश!

निसर्ग मित्र मंडळ व अक्षय चव्हाण सोशल फाउंडेशनचा स्तुत्य उपक्रम; महिलांचा उत्स्फूर्त सहभाग

काशिनाथ शिंदे

वाल्हेकरवाडी, चिंचवड : निसर्ग हाऊसिंग सोसायटी, वाल्हेकरवाडी येथे निसर्ग मित्र मंडळ आणि अक्षय चव्हाण सोशल फाउंडेशन यांच्या संयुक्त विद्यमाने कोजागिरी पौर्णिमेनिमित्त महिलांसाठी विशेष कार्यक्रमाचे आयोजन करण्यात आले. विविध मनोरंजक उपक्रमांनी रंगलेल्या या कार्यक्रमात महिलांनी उत्स्फूर्त सहभाग घेत आनंद लुटला. उत्सवानिमित्त पर्यावरण संवर्धन आणि सामाजिक जनजागृतीचा संदेशही देण्यात आला.

कार्यक्रमानंतर उपस्थितांना मसाला दुधाचे वाटप करण्यात आले. कोजागिरीच्या आनंदासोबतच पर्यावरण रक्षणाची जाणीव नागरिकांमध्ये निर्माण करण्यासाठी आयोजकांनी विशेष जनजागृती अभियान राबविले.

या वेळी ॲड. अक्षय चव्हाण यांनी पर्यावरण संवर्धनाचे महत्त्व अधोरेखित केले. प्लास्टिकचा वापर टाळणे, पाण्याची बचत करणे, वृक्षतोड रोखणे आणि झाडांचे संवर्धन करणे ही प्रत्येक नागरिकाची जबाबदारी आहे, असे त्यांनी सांगितले. पर्यावरणाचा समतोल राखण्यासाठी नागरिकांनी दैनंदिन जीवनात पर्यावरणपूरक सवयी अंगीकाराव्यात, असे आवाहनही त्यांनी केले.

प्लास्टिकला पर्याय म्हणून कापडी पिशव्यांचे वाटप

प्लास्टिकच्या पिशव्यांचा वापर कमी करून पर्यावरणपूरक पर्याय स्वीकारण्याच्या उद्देशाने नागरिकांना विशेष संदेश छापलेल्या कापडी पिशव्यांचे वाटप करण्यात आले. या पिशव्यांवर ‘पाणी वाचवा, निसर्ग वाचवा, वृक्षतोड थांबवा’ असे संदेश छापण्यात आले होते. या उपक्रमातून पर्यावरण संरक्षणाचा विचार घराघरांत पोहोचविण्याचा प्रयत्न करण्यात आला.

कोजागिरी पौर्णिमेचा उत्सव, महिलांचा सहभाग आणि पर्यावरण संवर्धनाची जनजागृती यांचा संगम साधणाऱ्या या उपक्रमातून सामाजिक बांधिलकी जपण्याबरोबरच निसर्ग रक्षणाचा संदेश परिसरातील नागरिकांपर्यंत पोहोचविण्यात आला.