जुन्नरमधील घरफोडी टोळीचा पर्दाफाश! चार आरोपी जेरबंद; ३८.५० लाखांचा मुद्देमाल जप्त

१५० सीसीटीव्ही कॅमेऱ्यांच्या तपासातून पोलिसांनी लावला छडा; चोरीचे दागिने खरेदी करणाऱ्या सोनाराचाही समावेश

काशिनाथ शिंदे

पुणे : जुन्नर तालुक्यातील ओतूर आणि नारायणगाव परिसरात रात्रीच्या वेळी घरफोड्या करून सोन्या-चांदीचे दागिने चोरणाऱ्या आंतरजिल्हा टोळीचा पुणे ग्रामीण पोलिसांनी पर्दाफाश केला आहे. स्थानिक गुन्हे शाखा आणि ओतूर पोलिसांनी संयुक्त कारवाई करत चार आरोपींना अटक केली असून, त्यांच्याकडून सुमारे ३८ लाख ५० हजार रुपयांचा मुद्देमाल जप्त केला आहे. या कारवाईमुळे घरफोडीचे चार गुन्हे उघडकीस आले आहेत.

१५० सीसीटीव्ही कॅमेऱ्यांच्या मदतीने तपास

५ ऑक्टोबर २०२६ रोजी ओतूर पोलीस ठाण्याच्या हद्दीत घराचे कुलूप तोडून सोन्या-चांदीचे दागिने चोरीला गेल्याची घटना घडली होती. याशिवाय ओतूर आणि नारायणगाव परिसरातही अशाच प्रकारच्या घरफोड्या झाल्या होत्या. या घटनांची गंभीर दखल घेत पुणे ग्रामीणचे पोलीस अधीक्षक संदीप सिंह गिल यांनी स्थानिक गुन्हे शाखेला तपासाचे आदेश दिले.

त्यानुसार पोलिसांनी घटनास्थळांसह आसपासच्या परिसरातील सीसीटीव्ही फुटेज तपासण्यास सुरुवात केली. संशयित कारचा माग काढताना ओतूरपासून नाशिकपर्यंत सुमारे १५० सीसीटीव्ही कॅमेऱ्यांतील चित्रण तपासण्यात आले. गोपनीय माहिती आणि तांत्रिक विश्लेषणाच्या आधारे संशयित आरोपींचा ठावठिकाणा शोधण्यात पोलिसांना यश आले.

नाशिकमधून तिघांना अटक

पोलिसांनी नाशिकमधील वडाळा आणि लासलगाव परिसरात सापळा रचून घरफोडीच्या गुन्ह्यांशी संबंधित असल्याच्या आरोपावरून तिघांना अटक केली. त्यांची नावे पुढीलप्रमाणे आहेत.

१. वसीम मुनीर पठाण (वय २६), रा. पिंपळगावजवळ, लासलगाव, ता. निफाड, जि. नाशिक.

२. अदनान युनुस पठाण (वय २६), रा. वडाळा, इंदिरानगर, नाशिक; मूळ रा. पिंपळगावजवळ, लासलगाव, ता. निफाड.

३. सोनू उर्फ मोहम्मद शरीफ रसूल शेख (वय ४०), रा. पिंपळगावजवळ, लासलगाव, ता. निफाड, जि. नाशिक.

 

चोरीचे दागिने खरेदी करणारा सोनारही अटकेत

तपासादरम्यान चोरीचे सोन्या-चांदीचे दागिने खरेदी करणाऱ्या चौथ्या आरोपीचाही सहभाग समोर आला. पोलिसांनी सागर अशोक शिंदे (वय ३०, रा. विंचूर, ता. निफाड, जि. नाशिक) याला अटक केली. त्यामुळे या प्रकरणात एकूण चार आरोपींना अटक करण्यात आली आहे.

३८.५० लाखांचा मुद्देमाल हस्तगत

पोलिसांनी आरोपींकडून एकूण ३८ लाख ५० हजार रुपये किमतीचा मुद्देमाल जप्त केला आहे. यामध्ये १९ तोळे सोन्याचे दागिने, २ किलो ७३० ग्रॅम चांदी, दोन लाख रुपये रोख रक्कम आणि गुन्ह्यात वापरलेल्या कारचा समावेश आहे.

आरोपी घरफोडी करताना पोलिसांची पकड चुकवण्यासाठी वायरलेस वॉकी-टॉकीचा वापर करत असल्याचे तपासात समोर आले. पोलिसांनी संबंधित वॉकी-टॉकीही जप्त केली आहे.

वरिष्ठ अधिकाऱ्यांच्या मार्गदर्शनाखाली कारवाई

पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक डॉ. शुभम कुमार आणि उपविभागीय पोलीस अधिकारी धनंजय पाटील यांच्या मार्गदर्शनाखाली ही कारवाई करण्यात आली.

स्थानिक गुन्हे शाखेचे पोलीस निरीक्षक प्रमोद क्षीरसागर, सहायक पोलीस निरीक्षक महादेव शेलार, ओतूर पोलीस ठाण्याचे सहायक पोलीस निरीक्षक ज्ञानेश्वर बाजगिरे, पोलीस उपनिरीक्षक युवराज जाधव आणि त्यांच्या सहकाऱ्यांनी या कारवाईत सहभाग घेतला.

या कारवाईमुळे जुन्नर तालुक्यातील चार घरफोडीचे गुन्हे उघडकीस आले असून, या प्रकरणाचा पुढील तपास ओतूर पोलीस करत आहेत.