DakshTimes News Network
आमदार शंकर जगताप यांची घोषणा; भाऊसाहेब भोईर यांच्या ‘कलाकार कट्ट्या’चा वर्धापन दिन विविध कलाविष्कारांनी उत्साहात साजरा
काशिनाथ शिंदे
पिंपरी : नाटक, संगीत आणि कला या माणसाच्या जीवनातील अविभाज्य घटक आहेत. या कलांमुळेच माणसाला जगण्याची नवी उमेद आणि सकारात्मक दृष्टिकोन मिळतो. स्थानिक रंगभूमीला नवोदित कलाकार मिळावेत, त्यांना हक्काचे व्यासपीठ उपलब्ध व्हावे आणि ज्येष्ठ अभिनेते नाना पाटेकर यांच्या स्मृती कायम जिवंत राहाव्यात, या उद्देशाने पिंपरी-चिंचवडमध्ये आगामी काळात ‘कै. नाना पाटेकर राज्यस्तरीय स्मृती करंडक आंतरमहाविद्यालयीन नाट्यस्पर्धा’ आयोजित करण्यात येणार असल्याची घोषणा आमदार शंकर जगताप यांनी केली.
अखिल भारतीय मराठी नाट्य परिषद, पिंपरी-चिंचवड शाखा आणि कै. लक्ष्मणभाऊ जगताप कला, क्रीडा अकादमी यांच्या संयुक्त विद्यमाने या स्पर्धेचे आयोजन करण्यात येणार आहे. ज्येष्ठ नेते भाऊसाहेब भोईर आणि आपण सक्रिय असेपर्यंत हा उपक्रम सातत्याने सुरू ठेवला जाईल, अशी ग्वाहीही जगताप यांनी दिली.
अखिल भारतीय मराठी नाट्य परिषद, पिंपरी-चिंचवड शाखेच्या वतीने शुक्रवारी (दि. ५ नोव्हेंबर) चिंचवड येथील पंडित पद्माकर कुलकर्णी कला मंदिर, प्रा. रामकृष्ण मोरे नाट्यगृहाच्या तळमजल्यावर ‘कलाकार कट्टा’चा वर्धापन दिन आणि रंगभूमी दिन उत्साहात साजरा करण्यात आला. यावेळी आयोजित सोहळ्यात आमदार जगताप बोलत होते. अखिल भारतीय मराठी नाट्य परिषदेचे मध्यवर्ती शाखेचे उपाध्यक्ष तथा कलाकार कट्ट्याचे संस्थापक भाऊसाहेब भोईर, नगरसेवक शेखर चिंचवडे यांच्यासह नाट्य परिषदेचे पदाधिकारी, कलाकार आणि रसिक मोठ्या संख्येने उपस्थित होते.
यावेळी बोलताना आमदार जगताप म्हणाले, “नाटक, संगीत आणि कला नसत्या तर माणसाचे जीवन किती निरस झाले असते, याची जाणीव कोविडच्या काळात सर्वांना झाली. कलेचे समाजावर मोठे ऋण आहे. स्थानिक कलाकारांना प्रोत्साहन देणे आणि शहरातील नाट्य चळवळीला व्यापक व्यासपीठ मिळवून देणे ही आपली जबाबदारी आहे. त्यातूनच नाना पाटेकर यांच्या स्मृती जपणाऱ्या राज्यस्तरीय नाट्यस्पर्धेचा उपक्रम हाती घेण्यात येत आहे.”
यावेळी त्यांनी नागरिकांना दिवाळी आणि कलाकार कट्ट्याच्या वर्धापन दिनाच्या शुभेच्छा देत शहर स्वच्छ ठेवण्याबरोबरच वाहतुकीचे नियम काटेकोरपणे पाळण्याचे आवाहन केले.
भाऊसाहेब भोईर यांचे नाट्य चळवळीतील योगदान अधोरेखित
भाऊसाहेब भोईर म्हणाले की, जीवनातील नैराश्य आणि अपयशाच्या काळात रंगभूमी माणसाला सकारात्मकतेने जगण्याचा दृष्टिकोन देते. पिंपरी-चिंचवडमधील नाट्य चळवळीला लोकनेते शरद पवार यांनी पाठबळ दिले. तसेच दिवंगत उपमुख्यमंत्री अजितदादा पवार, दिवंगत आमदार लक्ष्मणभाऊ जगताप, माजी आमदार विलास लांडे आणि ज्येष्ठ नेते आझमभाई पानसरे यांचेही मोठे योगदान आहे.
नाट्य परिषदेच्या सभासदांच्या योगदानामुळे पिंपरी-चिंचवडमध्ये दोन वेळा अखिल भारतीय मराठी नाट्य संमेलन आयोजित करण्यात आले. देशात असे उदाहरण दुर्मीळ असल्याचे त्यांनी नमूद केले. कलाकार कट्ट्याने एका वर्षात विविध कलाप्रकारांना एकाच व्यासपीठावर आणत नवोदितांपासून अनुभवी कलाकारांपर्यंत सर्वांना कला सादर करण्याची संधी दिली आहे. नागरिकांनी शहर स्वच्छ आणि कचरामुक्त ठेवण्यासाठी पुढाकार घेऊन महापालिका प्रशासनाला सहकार्य करावे, असे आवाहनही त्यांनी केले.
विविध कलाविष्कारांनी रंगला वर्धापन दिन
कार्यक्रमाची सुरुवात गणेश वंदनेने झाली. त्यानंतर तबलावादन, नृत्य, बालनाट्य, काव्यवाचन, गायन, भारूड, लावणी, विनोदी सादरीकरण आणि चित्रप्रदर्शन अशा विविध कलाप्रकारांनी उपस्थितांची मने जिंकली.
नृत्यार्पण ग्रुपच्या कनक देशमुख, वृंदा जोशी, निहारिका शिंदे आणि इशा झा यांनी नृत्य सादर केले. बालकलाकार श्रीजा उज्जैनकर, अन्वी फटांगरे, वरद फटांगरे, यज्ञा पाटील, व्रिहा काळे, रजत देशमुख आणि शौर्य मुजुमदार यांनी बालनाट्याच्या माध्यमातून आपली कला सादर केली.
काव्यवाचन सत्रात सुरेश कंक, संजय गमे आणि राधाबाई वाघमारे यांनी कविता सादर केल्या. स्वर सुधा संगीत विद्यालयाच्या विद्यार्थिनी निधी लच्याण, रुजुला बांडे, केशवी धर्माधिकारी, श्रेया त्रिकूटकर, गाथा चव्हाण, उर्वी नाईक, मैथिली कुलकर्णी, अस्मी खामितकर आणि गायत्री कुलकर्णी यांनी गायनाची मैफल सजवली.
आसाराम कसबे यांनी भारूड सादर करून महाराष्ट्राच्या लोकपरंपरेचे दर्शन घडवले. दिवंगत ज्येष्ठ लावणी कलावंत मधू कांबीकर यांना आदरांजली म्हणून शुभ्रा घायतडक यांनी लावणी सादर केली. गणेश कांबळे यांनी शेतकरी आत्महत्येच्या गंभीर प्रश्नावर आधारित कलाविष्कार सादर केला, तर सुहास जोशी यांच्या विनोदी नाट्यकथेने कार्यक्रमात हास्याची कारंजी फुलवली. वैशाली गायकवाड आणि रती देशमुख यांच्या चित्रांचे प्रदर्शनही रसिकांसाठी खुले करण्यात आले होते.
कलाकारांचा पुरस्कार देऊन गौरव
या सोहळ्यात सुरेश कंक, वृषाली भणगे, ऋतुजा महाजन, गणेश कांबळे, शुभ्रा घायतडक आणि केतन लुंकड यांचा पुरस्कार देऊन गौरव करण्यात आला. ‘नांदी नव्या पर्वाची, शोध प्रतिभेचा जागर कलेचा’ या घोषवाक्याने वर्षभरात आयोजित केलेल्या विविध कार्यक्रमांचा आढावा घेणाऱ्या स्मरणिकेचे प्रकाशनही करण्यात आले.
कार्यक्रमाच्या यशस्वी आयोजनासाठी कलाकार कट्टा नियोजन समितीचे राजेंद्र बंग, सुहास जोशी, सीमा गांधी, गौरी लोंढे, राज अहेरराव, रवी दामोदरे, संतोष रासने, किरण येवलेकर, अश्विनी कुलकर्णी, प्रकाश ढवळे, आसाराम कसबे आदींनी परिश्रम घेतले. सूत्रसंचालन सीमा गांधी यांनी केले, तर आकाश थिटे यांनी आभार मानले.
नाना पाटेकर स्मृती करंडकाच्या घोषणेमुळे पिंपरी-चिंचवडच्या सांस्कृतिक विश्वात नव्या पर्वाची नांदी झाली असून, नवोदित कलाकारांना राज्यस्तरावर आपली प्रतिभा सिद्ध करण्याची संधी उपलब्ध होणार आहे.
