DakshTimes News Network
काशिनाथ शिंदे: पिंपरी चिंचवड
पिंपरी : चिंचवडे नगर परिसरातील स्वामी समर्थ कॉलनी येथे शॉर्टसर्किटमुळे दोन इलेक्ट्रिक दुचाकींना भीषण आग लागून एकच खळबळ उडाली. आग इतकी भीषण होती की तिचे लोळ तळमजल्यापासून थेट दुसऱ्या मजल्यापर्यंत पोहोचले. या घटनेत इमारतीतील तीन कुटुंबांना सुरक्षित बाहेर काढत पिंपरी-चिंचवड महानगरपालिकेच्या अग्निशामक दलाने धाडसी बचावकार्य करून मोठी जीवितहानी टाळली. स्थानिक नागरिकांनीही या बचाव मोहिमेत मोलाची मदत केली.
या घटनेनंतर नगरसेवक शेखर बबनराव चिंचवडे यांनी अग्निशामक दलाच्या जवानांचे आभार मानत चिंचवडे नगर, वाल्हेकरवाडी आणि शिवनगरी परिसरातील अरुंद रस्त्यांच्या समस्येकडे लक्ष वेधले. या भागातील अनेक कॉलन्यांमध्ये रस्त्यावरच वाहने उभी केली जात असल्याने अग्निशामक दलाच्या गाड्या तसेच रुग्णवाहिका वेळेत पोहोचण्यास अडथळे निर्माण होतात. भविष्यात अशा परिस्थितीत मोठी जीवितहानी होण्याची शक्यता असल्याचा इशारा त्यांनी दिला.
नागरिकांनी आपल्या वाहनांचे पार्किंग रस्त्यावर न करता स्वतःच्या पार्किंगमध्येच करावे, असे आवाहनही त्यांनी केले. तसेच पिंपरी-चिंचवड महानगरपालिकेकडे शहरातील अरुंद रस्ते आणि वसाहती लक्षात घेऊन लहान आकाराच्या अग्निशामक गाड्या उपलब्ध करून देण्याची मागणी केल्याचे त्यांनी सांगितले. अशा वाहनांमुळे आपत्कालीन परिस्थितीत अग्निशमन दलाला घटनास्थळी त्वरित पोहोचून प्रभावी मदत करता येईल, असेही त्यांनी स्पष्ट केले.
