DakshTimes News Network
काशिनाथ शिंदे : पुणे
पुण्यातील नर्‍हे-नवले पूल परिसरात एका व्यावसायिकाची तब्बल एक कोटी रुपयांची रोकड लुटण्याचा सुनियोजित कट पुणे पोलिसांच्या सतर्कतेमुळे हाणून पाडण्यात आला. धक्कादायक बाब म्हणजे, ज्या व्यावसायिकाची रोकड लुटण्याचा प्रयत्न झाला, त्याचाच खासगी कारचालक या कटाचा मुख्य सूत्रधार असल्याचे तपासात उघड झाले आहे. या प्रकरणी नर्‍हे पोलिसांनी तिघांना अटक केली असून फरार आरोपींचा शोध सुरू आहे.
मिळालेल्या माहितीनुसार, तळेगाव दाभाडे येथील एक व्यावसायिक एक कोटी रुपयांची रोकड घेऊन सिंहगड रोडमार्गे नर्‍हे येथील खासगी बँकेच्या शाखेत जात होते. त्यांच्यासोबत कारमध्ये त्यांचा खासगी चालक आणि एक सहकारीही उपस्थित होता.
कार नवले पूल परिसरात पोहोचताच मोटारसायकलवरून आलेल्या दोन जणांनी कार अडवली. त्यातील एकाने स्वतःला पोलीस असल्याचे भासवत वाहनात बेकायदेशीर रोकड असल्याची बतावणी केली. आरोपींनी कारचे दरवाजे उघडून रोकड असलेल्या बॅगा हिसकावण्याचा प्रयत्न केला. मात्र, घटनास्थळी नागरिकांची गर्दी वाढू लागल्याने त्यांचा डाव फसला आणि आरोपींनी तेथून पळ काढला.
घटनेनंतर नर्‍हे पोलिसांनी तातडीने तपासाची चक्रे फिरवली. तांत्रिक पुरावे, चौकशी आणि हालचालींचा मागोवा घेतल्यानंतर धक्कादायक सत्य समोर आले. व्यावसायिकाच्या विश्वासातील खासगी चालकानेच आपल्या मित्रांसह आणि इतर साथीदारांच्या मदतीने हा संपूर्ण कट रचल्याचे निष्पन्न झाले.
याप्रकरणी नर्‍हे पोलिसांनी तिघा आरोपींना अटक केली असून त्यांच्याकडून अधिक चौकशी सुरू आहे. या गुन्ह्यात सहभागी असलेल्या इतर फरार आरोपींचा शोध घेण्यासाठी विशेष पथके रवाना करण्यात आली आहेत.
या घटनेमुळे व्यावसायिकांकडून मोठ्या प्रमाणात रोख रक्कम वाहतूक करताना आवश्यक सुरक्षा उपाययोजना आणि सतर्कता बाळगण्याची गरज पुन्हा अधोरेखित झाली आहे. पुणे पोलिसांच्या तातडीच्या आणि प्रभावी कारवाईमुळे कोट्यवधी रुपयांची रोकड सुरक्षित राहिली असून मोठा गुन्हा टळला आहे.
