DakshTimes News Network
काशिनाथ शिंदे : नवी दिल्ली
पिंपरीचिंचवड शहरातील संरक्षण विभागाच्या अखत्यारीतील ‘रेड झोन’मुळे नागरिकांना भेडसावणाऱ्या दीर्घकालीन आणि गंभीर प्रश्नावर केंद्रीय संरक्षणमंत्री राजनाथ सिंह यांची नवी दिल्ली येथे भेट घेऊन सविस्तर चर्चा करण्यात आली. या भेटीत रेड झोनमुळे रखडलेले विकास प्रकल्प, बांधकाम परवानग्या आणि नागरिकांच्या अडचणींबाबत लक्ष वेधण्यात आले.
यावेळी संरक्षण मंत्रालय, स्थानिक प्रशासन आणि संबंधित यंत्रणांची संयुक्त बैठक घेऊन या प्रश्नावर ठोस व नागरिकांना दिलासा देणारा मार्ग काढावा, अशी मागणी करण्यात आली. नागरिकांच्या न्याय्य हक्कांचे संरक्षण करताना शहराच्या विकासालाही गती मिळावी, यासाठी तातडीने सकारात्मक निर्णय घेण्याची विनंती संरक्षणमंत्र्यांकडे करण्यात आली.
पिंपरी-चिंचवडमधील लाखो नागरिकांच्या न्याय हक्कांसाठी आणि शहराच्या सर्वांगीण विकासासाठी हा पाठपुरावा यापुढेही सातत्याने सुरू राहणार असल्याचे यावेळी स्पष्ट करण्यात आले. रेड झोनचा प्रश्न मार्गी लागल्यास शहरातील अनेक रखडलेले विकास प्रकल्प आणि नागरिकांच्या अडचणी दूर होण्याची अपेक्षा व्यक्त केली जात आहे.
