DakshTimes News Network
काशिनाथ शिंदे : वाकड
मुख्यमंत्री देवेंद्र फडणवीस यांच्या वाढदिवसानिमित्त आमदार शंकर जगताप यांच्या मार्गदर्शनाखाली उपक्रम; नगरसेविका स्नेहा कलाटे यांच्या हस्ते रेनकोटचे वितरण
वाकड : महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त वाकड येथे वाहतूक पोलिसांप्रती कृतज्ञता व्यक्त करणारा सेवाभावी उपक्रम राबविण्यात आला. चिंचवड विधानसभा मतदारसंघाचे आमदार शंकर जगताप यांच्या मार्गदर्शनाखाली वाकड वाहतूक विभागातील पोलीस अधिकारी, कर्मचारी, महिला पोलीस कर्मचारी आणि वाहतूक वॉर्डन यांना पावसाळ्यात कर्तव्य बजावताना उपयोगी पडतील असे रेनकोट वाटप करण्यात आले.
नगरसेविका स्नेहा रणजित कलाटे यांच्या हस्ते रेनकोटचे वितरण करण्यात आले. यावेळी त्यांनी, “मुसळधार पाऊस असो वा कडक ऊन, नागरिकांच्या सुरक्षिततेसाठी वाहतूक पोलीस आणि वॉर्डन अहोरात्र रस्त्यावर उभे राहून सेवा बजावत असतात. त्यांच्या निःस्वार्थ सेवेला मानवंदना म्हणून हा छोटासा उपक्रम आयोजित करण्यात आला आहे,” असे सांगितले.
कार्यक्रमाला वाकड वाहतूक विभागाचे वरिष्ठ पोलीस निरीक्षक बापू ढेरे, ठाणे अंमलदार, वाहतूक विभागातील अधिकारी, पोलीस कर्मचारी, महिला पोलीस कर्मचारी तसेच वाहतूक वॉर्डन मोठ्या संख्येने उपस्थित होते.
नागरिकांच्या सुरक्षिततेसाठी सातत्याने रस्त्यावर कर्तव्य बजावणाऱ्या वाहतूक पोलिसांप्रती कृतज्ञता व्यक्त करणाऱ्या या उपक्रमाचे उपस्थितांनी स्वागत केले. मुख्यमंत्री देवेंद्र फडणवीस यांच्या वाढदिवसानिमित्त राबविण्यात आलेल्या या सेवाभावी उपक्रमाचे सर्व स्तरांतून कौतुक होत आहे.
