DakshTimes News Network
काशिनाथ शिंदे :पुणे
पुण्यातील घोरपडे पेठ परिसरात पोलिस चौकीसमोरच भरदिवसा एका तरुणावर गोळीबार झाल्याने शहरात एकच खळबळ उडाली. पूर्ववैमनस्यातून झालेल्या या हल्ल्यात ख्वाजा उद्दीन नाजीर शेख उर्फ नूरू शेख हा तरुण जखमी झाला असून, त्याच्यावर रुग्णालयात उपचार सुरू आहेत. डॉक्टरांनी त्याची प्रकृती स्थिर असल्याचे सांगितले आहे.
मिळालेल्या माहितीनुसार, आज दुपारी सुमारे १२ वाजण्याच्या सुमारास सुजल सुनील परदेशी आणि त्याच्या साथीदारांनी नूरू शेख याच्यावर तीन राऊंड गोळीबार केला. यामध्ये एक गोळी नूरू शेखच्या पाठीला लागली. घटनेनंतर परिसरात नागरिकांची मोठी गर्दी झाली आणि काही काळ भीतीचे वातावरण निर्माण झाले.
या घटनेनंतर आरोपी पळून जाण्याच्या प्रयत्नात असताना खडक पोलीस ठाण्यातील पोलीस कर्मचारी इम्रान नदाफ यांनी धाडस दाखवत मुख्य आरोपी सुजल परदेशी याला ताब्यात घेतले. त्यानंतर खडक पोलिसांच्या पथकाने अवघ्या २० मिनिटांत उर्वरित तीन साथीदारांनाही अटक करून गुन्ह्याचा वेगाने छडा लावला.
प्राथमिक तपासात हा हल्ला पूर्ववैमनस्यातून झाल्याचे समोर आले आहे. आरोपींविरुद्ध खडक पोलीस ठाण्यात गुन्हा दाखल करण्यात आला असून, पोलिस उपायुक्तांच्या मार्गदर्शनाखाली पुढील तपास सुरू आहे.
पोलिस चौकीसमोरच घडलेल्या या धाडसी गोळीबारामुळे पुणेकरांमध्ये भीतीचे वातावरण निर्माण झाले आहे. मात्र, पोलिसांनी दाखविलेल्या तत्परतेमुळे आरोपींना अल्पावधीतच अटक करण्यात यश आल्याने नागरिकांनी पोलिसांच्या कारवाईचे कौतुक केले आहे. या प्रकरणातील सर्व आरोपींवर कठोर कारवाई केली जाणार असल्याचे पोलिसांकडून सांगण्यात आले आहे.
