Oplus_131072
काशिनाथ शिंदे : धाराशिव
धाराशिव जिल्ह्यातील विविध पवनचक्की प्रकल्पांमधून वीजवाहिनीच्या तारा चोरणाऱ्या टोळीचा स्थानिक गुन्हे शाखेने पर्दाफाश केला आहे. या कारवाईत दोन आरोपींना अटक करण्यात आली असून त्यांच्याकडून तब्बल १६ लाख ७० हजार रुपयांचा मुद्देमाल जप्त करण्यात आला आहे. या कारवाईमुळे पवनचक्की प्रकल्पातील तार चोरीचे चार गुन्हे उघडकीस आले आहेत.
धाराशिव जिल्ह्यातील पवनचक्की प्रकल्पांमधून वीजवाहिनीच्या तारा चोरीस जाण्याच्या घटना सातत्याने घडत होत्या. या गंभीर स्वरूपाच्या गुन्ह्यांची दखल घेत पोलीस अधीक्षक रितू खोखर यांनी स्थानिक गुन्हे शाखेचे पोलीस निरीक्षक विनोद इज्जपवार यांना हे गुन्हे तातडीने उघड करण्याचे आदेश दिले होते.
त्यानुसार, २४ जुलै २०२६ रोजी सहाय्यक पोलीस निरीक्षक सुदर्शन कासार व त्यांच्या पथकाने गोपनीय माहितीच्या आधारे वाशी तालुक्यातील बोरी पाटी पारधी पिढी परिसरातून दोन संशयितांना शिताफीने ताब्यात घेतले. त्यांच्याकडून एक महिंद्रा स्कॉर्पिओ आणि एक अशोक लेलँड दोस्त वाहन जप्त करण्यात आले.
चौकशीदरम्यान आरोपींनी आपल्या साथीदारांसह आंबेवाडी, बरमगाव, लोहारा आणि कळदेव निबाळा शिवारातील पवनचक्की प्रकल्पांमधून वीजवाहिनीच्या तारा चोरी केल्याची कबुली दिली. पोलिसांनी आरोपींकडून २९९ किलो वजनाच्या वीजवाहिनीच्या तारा, तसेच चोरीसाठी वापरण्यात आलेली दोन्ही वाहने असा एकूण १६.७० लाख रुपयांचा मुद्देमाल जप्त केला आहे.
आरोपींची वैद्यकीय तपासणी करून पुढील कायदेशीर कारवाईसाठी त्यांना बेंबळी पोलीस ठाण्याच्या ताब्यात देण्यात आले आहे.
ही उल्लेखनीय कारवाई पोलीस अधीक्षक रितू खोखर व अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक सुदर्शन कासार, पोलीस हवालदार शौकत पठाण, प्रकाश औताडे, जावेद काझी, फरहान पठाण तसेच रत्नदीप डोंगरे यांच्या पथकाने यशस्वीरीत्या पार पाडली.
About the Author
