DakshTimes News Network
काशिनाथ शिंदे : भोसरी
भोसरी एमआयडीसी परिसरातील एका उद्योगात सुरक्षेच्या उपाययोजनांकडे दुर्लक्ष झाल्याने २६ वर्षीय कामगाराचा दुर्दैवी मृत्यू झाल्याची धक्कादायक घटना उघडकीस आली आहे. छतावरील पत्रे बदलण्याचे काम करत असताना तोल जाऊन खाली पडल्याने कामगाराचा जागीच मृत्यू झाला. या प्रकरणी कामगारांच्या सुरक्षिततेसाठी आवश्यक खबरदारी न घेतल्याप्रकरणी कंपनीच्या संबंधित जबाबदार व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २१ जुलै २०२६ रोजी दुपारी सुमारे १२.४५ वाजता जे-ब्लॉक, प्लॉट क्रमांक ३५९, एमआयडीसी भोसरी येथील शुभम उद्योग कंपनीमध्ये ही दुर्घटना घडली. मोहम्मद सय्यद शोहराब (वय २६) हे छतावरील पत्रे बदलण्याचे काम करत असताना अचानक तोल जाऊन खाली लोखंडी पाईपवर कोसळले. या भीषण अपघातात त्यांच्या डोक्याला गंभीर दुखापत झाली आणि त्यांचा मृत्यू झाला.
या घटनेप्रकरणी पोलिस हवालदार जितेंद्र चंद्रकांत पाचर्णे यांनी फिर्याद दिली आहे. त्यानुसार समीर विजयकुमार भट (वय ५३, रा. धनकवडी, पुणे) यांच्याविरुद्ध भारतीय न्याय संहिता (बीएनएस) २०२३ च्या कलम १०६(१) अंतर्गत गुन्हा दाखल करण्यात आला आहे. कामगारांच्या सुरक्षिततेसाठी आवश्यक उपाययोजना न करता निष्काळजीपणे काम करून घेतल्याचा ठपका त्यांच्यावर ठेवण्यात आला आहे.
या प्रकरणाचा पुढील तपास एमआयडीसी भोसरी पोलीस करत असून, वृत्त लिहिपर्यंत आरोपीला अटक करण्यात आलेली नव्हती.
