DakshTimes News Network
काशिनाथ शिंदे: जामखेड
जामखेड तालुक्यातील नातेज येथे रथयात्रा उत्सवादरम्यान डीजे सुरू करण्याच्या वादातून एका तरुणावर कोयत्याने प्राणघातक हल्ला झाल्याची धक्कादायक घटना घडली. या हल्ल्यामुळे रथयात्रेच्या आनंदोत्सवाला गालबोट लागले असून परिसरात काही काळ तणावाचे वातावरण निर्माण झाले.
मिळालेल्या माहितीनुसार, डीजे वाजविण्यावरून झालेल्या वादाचे रूपांतर हाणामारीत झाले. त्यानंतर काही युवकांनी एका तरुणावर कोयत्याने सपासप वार करून गंभीर जखमी केले. या घटनेनंतर रथयात्रेत एकच गोंधळ उडाला आणि नागरिकांमध्ये भीतीचे वातावरण पसरले.
जखमी तरुणाला तातडीने खासगी रुग्णालयात दाखल करण्यात आले असून त्याच्यावर उपचार सुरू आहेत. या प्रकरणी पोलिसांनी तत्काळ कारवाई करत पाच ते सहा जणांविरुद्ध गुन्हा दाखल केला आहे. आरोपींचा शोध सुरू असून घटनेचा पुढील तपास पोलीस करीत आहेत.
धार्मिक उत्सवादरम्यान घडलेल्या या हिंसक प्रकारामुळे जामखेड तालुक्यात खळबळ उडाली असून, अशा घटनांवर कठोर कारवाई करण्याची मागणी नागरिकांकडून होत आहे.
