DakshTimes News Network
काशिनाथ शिंदे : देहूरोड
देहूरोड पोलिसांनी केलेल्या धडक कारवाईत सराईत गुन्हेगाराच्या ताब्यातून देशी बनावटीचे पिस्टल आणि जिवंत काडतूस जप्त करत संभाव्य गंभीर गुन्हा उधळून लावला. या कारवाईमुळे परिसरात खळबळ उडाली असून पोलिसांच्या सतर्कतेचे कौतुक होत आहे.
अरबाज उर्फ बिल्ला युसुफ खान (वय २४, रा. शितळानगर, थॉमस कॉलनी, मामुर्डी, ता. हवेली, जि. पुणे) असे अटक करण्यात आलेल्या सराईत गुन्हेगाराचे नाव आहे. देहूरोड पोलिसांना गोपनीय माहिती मिळाली होती की, एक तरुण पिस्टल आणि जिवंत काडतूस बाळगून संशयास्पदरीत्या फिरत आहे. माहितीची तात्काळ दखल घेत गुन्हे प्रकटीकरण पथकाने सापळा रचला.
शुक्रवारी (दि. १) सायंकाळी साडेसहा वाजण्याच्या सुमारास देहूरोड येथून साईनगरकडे जाणाऱ्या मुरुगन टेम्पल मार्गावर आरोपीला ताब्यात घेण्यात आले. अंगझडतीदरम्यान त्याच्याकडून सुमारे ५२ हजार रुपये किमतीचे देशी बनावटीचे एक पिस्टल आणि एक जिवंत काडतूस जप्त करण्यात आले. या प्रकरणी देहूरोड पोलीस ठाण्यात शस्त्रास्त्र कायद्यान्वये गुन्हा दाखल करण्याची प्रक्रिया सुरू होती.
तपासात आरोपी अरबाज उर्फ बिल्ला खान हा रेकॉर्डवरील सराईत गुन्हेगार असल्याचे समोर आले. त्याच्याविरुद्ध देहूरोड पोलीस ठाण्यात पाच, तर खडकी आणि वाकड पोलीस ठाण्यात प्रत्येकी एक असे एकूण सात गुन्हे दाखल आहेत.
ही उल्लेखनीय कारवाई वरिष्ठ पोलीस निरीक्षक विक्रम बनसोडे यांच्या मार्गदर्शनाखाली पोलीस उपनिरीक्षक अक्षय जाधव, लखनकुमार वाव्हळे, पोलीस हवालदार किरण खेडकर, सुरेश ढवळे, पोलीस शिपाई प्रशांत माळी, पंकज भदाणे, शुभम बावनकर, धीरज अंभोरे, मोमीन शेख आणि संतोष महाडिक यांच्या पथकाने यशस्वीरीत्या पार पाडली.
