DakshTimes News Network
काशिनाथ शिंदे : देहूरोड
देहूरोड कॅन्टोन्मेंट परिसरातील सातही वॉर्डांमध्ये वाढलेल्या कचऱ्याच्या ढिगाऱ्यांमुळे, तुंबलेल्या ड्रेनेज लाईन्स आणि अस्वच्छतेच्या समस्यांमुळे नागरिकांचे आरोग्य धोक्यात आले असून, या प्रश्नांवर देहूरोड शहर ब्लॉक काँग्रेस कमिटीने आक्रमक भूमिका घेत मुख्य कार्यकारी अधिकारी पुष्पांजली रावत यांना निवेदन सादर केले.
काँग्रेसच्या निवेदनानुसार, शहरातील अनेक भागांत नियमित कचरा उचलला जात नसल्याने दुर्गंधी पसरत आहे. तुंबलेल्या ड्रेनेज लाईन्समुळे सांडपाणी रस्त्यावर वाहत असून डासांचा प्रादुर्भाव वाढला आहे. त्यामुळे नागरिकांच्या आरोग्याचा गंभीर प्रश्न निर्माण झाला आहे. वारंवार तक्रारी करूनही प्रशासनाने कोणतीही ठोस उपाययोजना न केल्याचा आरोप काँग्रेसने केला.
स्वच्छता मोहीम तातडीने राबवून कचरा व्यवस्थापन आणि ड्रेनेज व्यवस्था सुरळीत करावी, अन्यथा नागरिकांना सोबत घेऊन तीव्र जनआंदोलन छेडण्यात येईल, असा इशारा काँग्रेस पदाधिकाऱ्यांनी प्रशासनाला दिला.
यावेळी देहूरोड शहर ब्लॉक काँग्रेस कमिटीचे माजी अध्यक्ष तथा कॅन्टोन्मेंट बोर्डाचे नगरसेवक हाजीमलंग काशीनाथ मारीमुत्तू, शहराध्यक्ष चंद्रशेखर काशीनाथ मारीमुत्तू, उपाध्यक्ष वेंकटेश कोळी, सचिव गोपाळ वेंकोबा राव, सहसचिव बबन टोम्पे, वेंकटेश विश्वनाथ, विष्णू नरसाप्पा, वेंकटेश मारीमुत्तू यांच्यासह पक्षाचे पदाधिकारी व कार्यकर्ते उपस्थित होते.
काँग्रेसने प्रशासनाला नागरिकांच्या संयमाची परीक्षा पाहू नये, असा स्पष्ट इशारा देत तातडीने कारवाई करण्याची मागणी केली.
