DakshTimes News Network
काशिनाथ शिंदे: आळंदी पिंपरी चिंचवड
इन्स्टंट ग्रँड आणि इन्स्टंट लोनच्या आमिषाला बळी पडलेल्या देशभरातील ६९ नागरिकांची तब्बल ₹१ कोटी ५६ लाखांची ऑनलाइन फसवणूक करणाऱ्या ‘म्युल अकाउंट’ रॅकेटचा आळंदी पोलिसांनी पर्दाफाश केला आहे. तांत्रिक तपासाच्या आधारे आरोपींना अटक करण्यात आली असून, सायबर गुन्हेगारीविरोधातील ही महत्त्वाची कारवाई मानली जात आहे.
पोलिस तपासात आरोपी विविध बँकांमध्ये बनावट अथवा इतरांच्या नावाने बँक खाती उघडून त्यांचा वापर फसवणुकीची रक्कम स्वीकारण्यासाठी आणि पुढे वळविण्यासाठी करत असल्याचे उघड झाले. या खात्यांचा वापर करून देशभरातील नागरिकांची मोठ्या प्रमाणावर आर्थिक फसवणूक करण्यात आली.
आळंदी पोलिसांनी तांत्रिक विश्लेषण, बँक व्यवहारांची माहिती आणि डिजिटल पुराव्यांच्या आधारे आरोपींपर्यंत पोहोचत या रॅकेटचा भांडाफोड केला.
या कारवाईनंतर पोलिसांनी नागरिकांना महत्त्वाचे आवाहन केले आहे. कोणत्याही अनोळखी व्यक्तीच्या सांगण्यावरून स्वतःचे बँक खाते, एटीएम कार्ड, चेकबुक, मोबाईल सिम, ओटीपी किंवा यूपीआयशी संबंधित माहिती कोणालाही देऊ नये. तसेच आपल्या नावावरील बँक खाते दुसऱ्याला वापरण्यास दिल्यास फसवणुकीच्या गुन्ह्यात आपणही कायदेशीर अडचणीत येऊ शकता, असा इशाराही पोलिसांनी दिला आहे.
पोलीसांचा इशारा :
“सहज मिळणाऱ्या पैशांच्या मोहापायी जर तुमचे बँक खाते गुन्हेगारांच्या हातात गेले, तर फसवणुकीच्या गुन्ह्यात आरोपी म्हणून तुमचेही नाव पोलीस नोंदीत येऊ शकते.”
ऑनलाइन व्यवहार करताना यूपीआय, मनी ट्रान्सफर, क्यूआर कोड आणि सोशल मीडियावरील आर्थिक व्यवहारांबाबत विशेष सतर्कता बाळगण्याचे आवाहन पोलिसांनी केले असून, सायबर गुन्हे रोखण्यासाठी जनजागृती हीच सर्वात प्रभावी उपाययोजना असल्याचेही नमूद करण्यात आले आहे.
