DakshTimes News Network
काशिनाथ शिंदे : सोलापूर
सोलापूर शहर गुन्हे शाखेने बनावट दिव्यांग प्रमाणपत्र तयार करून देणाऱ्या मोठ्या रॅकेटचा पर्दाफाश करत सोलापूरच्या शासकीय (सिव्हिल) रुग्णालयातील वैद्यकीय अधिकारी, वरिष्ठ लिपिक आणि इतर कर्मचाऱ्यांसह एकूण आठ जणांना अटक केली आहे. या कारवाईमुळे शासकीय यंत्रणेत मोठी खळबळ उडाली आहे.
या प्रकरणी पोलीस आयुक्तालयात गुन्हा क्रमांक 554/2026 नोंद करण्यात आला असून भारतीय न्याय संहिता कलम 318(4), 336(3), 338, 340(2), 233, 235, 3(5) तसेच इतर संबंधित कलमान्वये गुन्हा दाखल करण्यात आला आहे.
तपासात आरोपींनी बनावट आधारकार्ड तयार करून संबंधित व्यक्तींना दिव्यांग असल्याचे खोटे कागदपत्रांच्या आधारे UDID ऑनलाइन प्रणालीवर अर्ज करून बनावट दिव्यांग प्रमाणपत्रे मिळवून दिल्याचे निष्पन्न झाले आहे.
अटकेतील आरोपींमध्ये अहमदनगर येथील एका शासकीय कर्मचाऱ्यासह सोलापूर सिव्हिल हॉस्पिटलमधील वैद्यकीय अधिकारी, वरिष्ठ लिपिक आणि इतर कर्मचारी यांचा समावेश आहे.
पोलीस तपासात 1 जानेवारी 2025 ते 31 जुलै 2026 या कालावधीत सिव्हिल हॉस्पिटलमधून तब्बल 3,714 दिव्यांग प्रमाणपत्रे वितरित करण्यात आल्याचे समोर आले आहे. यापैकी संशयास्पद प्रमाणपत्रांची सखोल चौकशी सुरू असून या रॅकेटमध्ये आणखी काही जणांचा सहभाग असल्याची शक्यता तपासली जात आहे.
ही कारवाई पोलीस आयुक्त एम. राजकुमार व पोलीस उपायुक्त (गुन्हे) अश्विनी पाटील यांच्या मार्गदर्शनाखाली गुन्हे शाखेचे वरिष्ठ पोलीस निरीक्षक अरविंद माने यांच्या पथकाने केली. प्रकरणाचा पुढील तपास सुरू आहे.
