DakshTimes News Network
काशिनाथ शिंदे : सांगवी
पिंपरी-चिंचवड पोलीस आयुक्तालयाच्या सांगवी विभागासाठी स्वतंत्र सहायक पोलीस आयुक्त कार्यालय सुरू करण्यात आले आहे. नागरिकांना अधिक सुलभ, पारदर्शक आणि जलद पोलीस सेवा उपलब्ध करून देण्याबरोबरच विभागातील कार्यालयीन कामकाजाची कार्यक्षमता वाढविण्याच्या उद्देशाने हे नवीन कार्यालय कार्यान्वित करण्यात आले आहे.
नवीन कार्यालयाचे उद्घाटन ६ ऑगस्ट२०२६ रोजी पोलीस आयुक्त विनय कुमार चौबे यांच्या हस्ते फलकाचे अनावरण व फीत कापून करण्यात आले. यावेळी चौबे यांनी सांगवी विभागातील अधिकारी व अंमलदारांना शुभेच्छा देत नागरिकांना जलद, पारदर्शक आणि सुलभ पोलीस सेवा देण्याच्या सूचना दिल्या.
आधुनिक सुविधा, सुबक कार्यालयीन वातावरण आणि अद्ययावत कार्यपद्धतीमुळे सांगवी विभागातील नागरिकांना पोलीस प्रशासनाशी संबंधित कामांसाठी अधिक प्रभावी सेवा मिळण्यास मदत होणार आहे. नागरिकांच्या तक्रारी व समस्या अधिक तत्परतेने हाताळण्यावर भर देण्याचे निर्देशही यावेळी देण्यात आले.
या उद्घाटन कार्यक्रमास पोलीस सहआयुक्त डॉ. शशिकांत महावरकर, अपर पोलीस आयुक्त सारंग आवाड, अपर पोलीस आयुक्त डॉ. बसवराज तेली, तसेच पोलीस उपआयुक्त संदिप आटोळे, रोहिदास पवार, प्रदीप जाधव, मारुती जगताप, विक्रांत देशमुख आणि धिरज पाटील यांच्यासह वरिष्ठ अधिकारी उपस्थित होते.
सांगवी विभागाच्या सहायक पोलीस आयुक्त मनिषा कदम, पिंपरी विभागाचे सहायक पोलीस आयुक्त प्रशांत ढोले, परिमंडळ-१ मधील सर्व वरिष्ठ पोलीस निरीक्षक तसेच सांगवी विभागातील कार्यालयीन कर्मचारी यांचीही कार्यक्रमास उपस्थिती होती.
स्वतंत्र एसीपी कार्यालयामुळे सांगवी विभागातील पोलीस प्रशासन अधिक सक्षम होऊन ‘नागरिक प्रथम’ या भूमिकेतून सेवा देण्यास चालना मिळणार आहे.
