DakshTimes News Network
काशिनाथ शिंदे : चिखली पिंपरी चिंचवड
चिखली परिसरात मेफेड्रॉन (एमडी) विक्रीच्या तयारीत असलेल्या चौघांना अंमली पदार्थविरोधी पथकाने सापळा रचून अटक केली. आरोपींकडून ८ ग्रॅम ७३ मिलिग्रॅम एमडीसह चारचाकी, दुचाकी, चार मोबाईल आणि रोख रक्कम असा एकूण ७ लाख ३८ हजार १२० रुपयांचा मुद्देमाल जप्त करण्यात आला आहे.
ही कारवाई ६ ऑगस्ट रोजी रात्री सव्वानऊच्या सुमारास हरगुडे वस्ती ते स्पाईन रोडकडे जाणाऱ्या डांबरी रस्त्यावरील पत्र्याच्या शेडजवळ करण्यात आली.
या कारवाईत समशुद राजाबली शहा (वय २३), साहेबन मोहम्मद इलियास शहा (वय २१), सोहेल कादिर शेख (वय २१) आणि अमिराज जोखुराम कोरी (वय ३३) यांना पोलिसांनी ताब्यात घेतले. त्यांच्याकडून ८.७३ ग्रॅम एमडी, एक चारचाकी वाहन, एक दुचाकी, चार मोबाईल फोन आणि १२० रुपये रोख असा मुद्देमाल जप्त करण्यात आला.
मुंबईतील हर्ष यादव (केडीसी) याच्याकडून विक्रीसाठी एमडी आणल्याची माहिती चौकशीत आरोपींनी दिल्याचे पोलिसांनी सांगितले. त्यामुळे या प्रकरणातील पाचव्या आरोपीचा सहभाग आणि ड्रग्ज पुरवठ्याची साखळी तपासली जात आहे.
या प्रकरणी चिखली पोलीस ठाण्यात गुन्हा क्रमांक ५९८/२०२६ दाखल करण्यात आला असून, एनडीपीएस कायदा कलम८(क),२२(ब)आणि २९ अन्वये कारवाई करण्यात आली आहे.
या प्रकरणाचा पुढील तपास पोलीस उपनिरीक्षक देवकर करीत आहेत.
