DakshTimes News Network
काशिनाथ शिंदे : पिंपरी चिंचवड
पिंपरी-चिंचवड : कोल्हापूर जिल्ह्यातील चंदगड विधानसभा मतदारसंघाचे विद्यमान आमदार तथा महाराष्ट्र राज्य भारतीय जनता माथाडी जनरल कामगार युनियनचे संस्थापक अध्यक्ष मा. शिवाजी (भाऊ) पाटील यांच्या वाढदिवसानिमित्त सामाजिक बांधिलकी जपत पिंपरी-चिंचवड शहरातील माथाडी कामगारांनी आगळावेगळा उपक्रम राबविला.
भारतीय जनता माथाडी जनरल कामगार युनियनचे पुणे जिल्हाध्यक्ष तथा नामांकित पैलवान मा. विजय (भाऊ) भोसुरे यांच्या पुढाकारातून भोसरी येथील गोशाळेत टोळी क्रमांक ३३८ मधील सर्व माथाडी कामगारांच्या वतीने गोमातांना चारा अर्पण करण्यात आला. यावेळी गोमातेच्या चरणी प्रार्थना करून आमदार शिवाजी (भाऊ) पाटील यांना निरोगी, दीर्घायुष्य लाभावे तसेच त्यांच्या सर्व मनोकामना पूर्ण व्हाव्यात, अशी सामूहिक प्रार्थना करण्यात आली.
यावेळी विजय (भाऊ) भोसुरे यांनी सांगितले की, वाढदिवस हा केवळ शुभेच्छांचा दिवस नसून समाजोपयोगी कार्य करण्याची संधी आहे. त्याच भावनेतून गोसेवेचा हा उपक्रम आयोजित करण्यात आला असून समाजसेवा आणि कामगार हितासाठी आमदार शिवाजी (भाऊ) पाटील यांचे कार्य प्रेरणादायी असल्याचे त्यांनी नमूद केले.
कार्यक्रमाच्या शेवटी टोळी क्रमांक ३३८ मधील सर्व माथाडी कामगारांच्या वतीने आमदार शिवाजी (भाऊ) पाटील यांना वाढदिवसाच्या मनःपूर्वक शुभेच्छा देण्यात आल्या.
