DakshTimes News Network
काशिनाथ शिंदे: पिंपरी चिंचवड आळंदी
आळंदी पोलीस ठाण्यात दाखल असलेल्या गुन्ह्यात तब्बल १८ वर्षांपासून फरार असलेल्या ६३ वर्षीय पाहिजे आरोपीला गुन्हे शाखा युनिट-३च्या पथकाने शिताफीने ताब्यात घेतले. काशिनाथ बाळकृष्ण दिघे (वय ६३, रा. कोयाळी, ता. खेड, सध्या रा. शरदवाडी, ता. शिरूर, जि. पुणे) असे ताब्यात घेतलेल्या आरोपीचे नाव आहे.
गुन्हे शाखा युनिट-३चे पोलीस अंमलदार पीसी/१३०६खेडेकर आणि पीसी/४२३६ राठोड हे ९ ऑगस्ट रोजी पाहिजे व फरारी आरोपींचा शोध घेत असताना पोलीस अंमलदार खेडेकर यांना दिघे हा शरदवाडी येथे असल्याची गोपनीय माहिती मिळाली.
माहितीची खातरजमा करून पथकाने शरदवाडी येथे जाऊन सापळा रचत आरोपी काशिनाथ दिघे याला ताब्यात घेतले. त्यानंतर त्याची वैद्यकीय तपासणी करून पुढील कायदेशीर कारवाईसाठी त्याला आळंदी पोलीस ठाण्याच्या ताब्यात देण्यात आले.
दिघे याच्याविरुद्ध आळंदी पोलीस ठाणे गुन्हा रजिस्टर क्रमांक २७१/२००८, भारतीय दंड विधान कलम ४०६ अन्वये गुन्हा दाखल आहे. या गुन्ह्यात तो तब्बल १८ वर्षांपासून पोलिसांना हुलकावणी देत फरार होता.
ही उल्लेखनीय कारवाई गुन्हे शाखा युनिट-३चे वरिष्ठ पोलीस निरीक्षक संतोष कसबे यांच्या मार्गदर्शनाखाली पोलीस अंमलदार पीसी/१३०६ खेडेकर व पीसी/४२३६ राठोड यांनी केली.
