DakshTimes News Network
काशिनाथ शिंदे : देहूरोड
देहूरोड शहर ब्लॉक काँग्रेस कमिटीच्या वतीने राष्ट्रीय क्रांती दिवस उत्साहात साजरा करण्यात आला. यावेळी देशाच्या स्वातंत्र्यासाठी आपल्या प्राणांची आहुती देणाऱ्या वीर स्वातंत्र्यसैनिकांच्या प्रतिमांचे पूजन करून त्यांना भावपूर्ण अभिवादन करण्यात आले.
९ ऑगस्ट १९४२ रोजी महात्मा गांधी यांच्या नेतृत्वाखाली ऐतिहासिक ‘भारत छोडो आंदोलन’ सुरू झाले. या आंदोलनाच्या माध्यमातून महात्मा गांधी यांनी देशवासीयांना ‘करेंगे या मरेंगे’ अर्थात ‘करा किंवा मरा’ हा स्वातंत्र्यप्राप्तीचा प्रेरणादायी मंत्र दिला. या ऐतिहासिक आंदोलनाने देशाच्या स्वातंत्र्यलढ्याला निर्णायक दिशा देत ब्रिटिश सत्तेविरोधातील जनआंदोलन अधिक तीव्र केले.
राष्ट्रीय क्रांती दिनानिमित्त स्वातंत्र्यलढ्यात मोलाचे योगदान देणाऱ्या स्वातंत्र्यसैनिकांच्या त्याग, शौर्य आणि देशभक्तीचे स्मरण करण्यात आले. त्यांच्या बलिदानातून प्रेरणा घेऊन देशाच्या लोकशाही मूल्यांचे आणि राष्ट्रीय एकात्मतेचे रक्षण करण्याचा संकल्प यावेळी करण्यात आला.
कार्यक्रमास पुणे जिल्हा काँग्रेसचे उपाध्यक्ष तसेच देहूरोड शहर ब्लॉक काँग्रेस कमिटीचे माजी अध्यक्ष व नगरसेवक हाजीमलंग काशीनाथ मारीमुत्तू, देहूरोड शहर ब्लॉक काँग्रेस कमिटीचे अध्यक्ष चंद्रशेखर मारीमुत्तू, उपाध्यक्ष वेंकटेश कोळी, सचिव बबन टोम्पे, मागासवर्गीय विभागाचे अध्यक्ष विल्सन पालिवाल, सदस्य येशू भंडारी, वेंकटेश विश्वनाथ, गौतम शिंदे, वेंकटेश मारीमुत्तू, विष्णू नरसाप्पा तसेच काँग्रेसचे पदाधिकारी व कार्यकर्ते मोठ्या संख्येने उपस्थित होते.
