DakshTimes News Network
काशिनाथ शिंदे : कल्याण
मोटार ड्रायव्हिंग स्कूल ओनर्स असोसिएशन महाराष्ट्र राज्याच्या वतीने कल्याण व डोंबिवली शहरातील मोटार ड्रायव्हिंग स्कूल संचालकांची बैठक डोंबिवली येथे उत्साहात पार पडली. यावेळी संघटनेच्या पदाधिकाऱ्यांची एकमताने निवड करण्यात आली. तसेच मोटार ड्रायव्हिंग स्कूल संचालकांच्या विविध प्रश्नांना संघटितपणे वाचा फोडून त्यांच्या हक्कांसाठी प्रभावीपणे पाठपुरावा करण्याचा निर्धार करण्यात आला.
कल्याण-डोंबिवली विभागाच्या माध्यमातून रस्ता सुरक्षा अभियानात महत्त्वपूर्ण योगदान देण्याचा निर्णय यावेळी घेण्यात आला. विविध कंपन्यांच्या सामाजिक दायित्व निधीच्या माध्यमातून हेल्मेट वाटप, रस्ता सुरक्षा जनजागृती तसेच नागरिक व वाहनचालकांमध्ये वाहतूक नियमांबाबत जागृती निर्माण करणारे उपक्रम राबविण्याचे ठरविण्यात आले.
यावेळी मोटार ड्रायव्हिंग स्कूल ओनर्स असोसिएशन महाराष्ट्र राज्याचे अध्यक्ष राजू घाटोळे, वरिष्ठ उपाध्यक्ष अनंत कुंभार, प्रसिद्धीप्रमुख विनोद वरखडे, सोशल मीडिया प्रमुख सूरज देवकर, मोटार ड्रायव्हिंग स्कूल संचालक अनुदीप येचकर, सल्लागार संतोष कपटकर यांच्यासह संघटनेचे पदाधिकारी व मोटार ड्रायव्हिंग स्कूल संचालक उपस्थित होते.
बैठकीदरम्यान महाराष्ट्र राज्य उपाध्यक्षपदी ज्योतीताई रवी माळेकर, महाराष्ट्र राज्य सचिवपदी रियाताई गजानन जोशी, तर महाराष्ट्र राज्य संघटकपदी निलेश शेठ हरिश्चंद्र गायकवाड यांची नियुक्ती करण्यात आली. नवनियुक्त पदाधिकाऱ्यांना नियुक्तीपत्र देऊन उपस्थित मोटार ड्रायव्हिंग स्कूल संचालकांच्या वतीने त्यांचे अभिनंदन करण्यात आले व पुढील कार्यासाठी शुभेच्छा देण्यात आल्या.
राज्यातील मोटार ड्रायव्हिंग स्कूल व्यवसायाशी संबंधित विविध अडचणी, परवाने, प्रशिक्षण व्यवस्था, विद्यार्थी व वाहनचालकांच्या समस्या तसेच शासनाच्या विविध नियमांबाबत संघटितपणे पाठपुरावा करण्यासाठी संघटनेला अधिक सक्षम करण्याचा निर्धार यावेळी व्यक्त करण्यात आला.
कल्याण व डोंबिवली परिसरातील मोटार ड्रायव्हिंग स्कूल संचालकांची विविध पदांवर नियुक्ती करून त्यांना नियुक्तीपत्रांचे वाटप करण्यात आले. संघटनेच्या विस्ताराच्या दृष्टीने हा महत्त्वपूर्ण टप्पा मानला जात आहे.
सरकारमान्य मोटार ड्रायव्हिंग स्कूलच्या हिताचे संरक्षण, त्यांच्या न्याय्य मागण्यांसाठी शासनदरबारी प्रभावी पाठपुरावा आणि व्यवसायाच्या विकासासाठी राज्यातील सर्व मोटार ड्रायव्हिंग स्कूल संचालकांना एका छताखाली आणण्याचा संकल्प यावेळी करण्यात आला. आगामी काळात संघटनेच्या माध्यमातून मोटार ड्रायव्हिंग स्कूल संचालकांच्या हक्कांसाठी आणि त्यांच्या व्यवसायाच्या प्रगतीसाठी व्यापक पातळीवर काम करण्याचा निर्धार पदाधिकाऱ्यांनी व्यक्त केला.
