DakshTimes News Network
शशिकांत सप्पागुरू यांचा उद्धव ठाकरे यांच्या शिवसेनेत जाहीर प्रवेश; शिवसेना भवनात पदाधिकाऱ्यांची उपस्थिती
काशिनाथ शिंदे : मावळ
शिवसेना उद्धव बाळासाहेब ठाकरे पक्षाला मावळ तालुक्यात आणखी एक बळ मिळाले आहे. श्री. शशिकांत सप्पागुरू यांनी शिवसेना उद्धव बाळासाहेब ठाकरे पक्षात जाहीर प्रवेश करून ‘घरवापसी’ केली. शिवसेना भवन येथे झालेल्या कार्यक्रमात पक्षाच्या वरिष्ठ नेत्यांच्या व पदाधिकाऱ्यांच्या उपस्थितीत त्यांचा पक्षप्रवेश झाला.
यावेळी शिवसेना नेते विनायक राऊत, शिवसेना प्रवक्ते नितीन नांदगावकर, मावळ तालुका संपर्क प्रमुख प्रभाकर पवार, मावळ तालुका प्रमुख आशिष ठोंबरे, जिल्हा संघटक बाळासाहेब फाटक, जिल्हा समन्वयक शांताराम भोते, जिल्हा सल्लागार मारुती खोले, शिवसेना जिल्हा सल्लागार रमेश जाधव, शिवसेना शहरप्रमुख संदीप बालघरे, महिला आघाडी जिल्हा संघटिका शैलाताई खंडागळे, राजेंद्र मोरे, देहू शहरप्रमुख विशाल गांधीले आदी पदाधिकारी उपस्थित होते.
“जुन्या सहकाऱ्यांसाठी पुन्हा घरवापसी”
पक्षप्रवेशानंतर शशिकांत सप्पागुरू यांनी आपली भूमिका स्पष्ट करताना सांगितले की, “शिंदे गटात काम करताना मन लागत नव्हते. माझे अनेक जुने जिवाभावाचे सहकारी उद्धव बाळासाहेब ठाकरे यांच्या शिवसेनेत आहेत. त्यामुळे मी पुन्हा माझ्या जुन्या घरात परतण्याचा निर्णय घेतला. आता पक्षात पुन्हा प्रवेश केल्यानंतर मला खूप समाधान वाटत आहे.”
सप्पागुरू यांच्या ‘घरवापसी’मुळे मावळ परिसरात उद्धव ठाकरे यांच्या शिवसेनेच्या संघटनात्मक ताकदीत वाढ होण्याची शक्यता व्यक्त होत आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर या पक्षप्रवेशाला राजकीय महत्त्व प्राप्त झाले आहे.
पक्षविस्ताराला मिळणार नवे बळ
मावळ तालुक्यात शिवसेना उद्धव बाळासाहेब ठाकरे पक्षाची संघटनात्मक बांधणी मजबूत करण्यासाठी पदाधिकाऱ्यांकडून प्रयत्न सुरू आहेत. त्यातच सप्पागुरू यांनी पुन्हा पक्षात प्रवेश केल्याने जुन्या कार्यकर्त्यांमध्येही उत्साहाचे वातावरण निर्माण झाले आहे.
“जुने सहकारी पुन्हा एकत्र; मावळात ठाकरे शिवसेनेचा संघटनात्मक पाया अधिक मजबूत करण्याचा निर्धार”, असा संदेश या पक्षप्रवेशातून देण्यात आला.
