DakshTimes News Network
काशिनाथ शिंदे
जुन्नर, पुणे : जुन्नर तालुक्यातील पिंपळवंडी येथे चिमुकलीवर अत्याचार करून तिची हत्या केल्याच्या धक्कादायक घटनेने संपूर्ण पुणे जिल्हा हादरला आहे. सायकल शिकवण्याच्या बहाण्याने चिमुकलीला घरापासून सुमारे दीड किलोमीटर अंतरावर नेण्यात आले. त्यानंतर सायकल एका ठिकाणी सोडून तिला घनदाट ऊसाच्या शेतात नेण्यात आल्याचे तपासात समोर आले आहे.
निर्मनुष्य ठिकाणाची आरोपीने आधीच पाहणी केली होती का, याचा तपास पोलिसांकडून सुरू आहे. दरम्यान, एका घरावरील सीसीटीव्ही कॅमेऱ्याच्या फुटेजने या गुन्ह्याच्या तपासाला निर्णायक दिशा मिळाल्याचे समोर आले आहे.
विशेष म्हणजे, चिमुकली बेपत्ता झाल्यानंतर तिच्या शोधासाठी ग्रामस्थ आणि पोलिसांसोबत आरोपीही फिरत होता. तपासाची दिशाभूल करून संशयापासून दूर राहण्याचा त्याचा प्रयत्न असल्याचा आरोप आहे. मात्र, सीसीटीव्ही फुटेज आणि पोलिसांच्या बारकाईच्या तपासामुळे त्याच्या हालचाली संशयाच्या भोवऱ्यात आल्या.
पोलिसांनी उपलब्ध पुरावे आणि सीसीटीव्ही फुटेजच्या आधारे तपासाची सूत्रे वेगाने हलवली आणि अखेर आरोपीचे बिंग फुटले. पोलिसांच्या तपासात महत्त्वाचे धागेदोरे हाती लागल्यानंतर संशयित आरोपीला ताब्यात घेण्यात आले.
या अमानुष घटनेने परिसरात संतापाची लाट उसळली असून, चिमुकलीवर अत्याचार करून तिची हत्या करणाऱ्या आरोपीला कठोरात कठोर शिक्षा द्यावी, अशी संतप्त मागणी ग्रामस्थांकडून होत आहे. नसरापूर प्रकरणाप्रमाणेच या प्रकरणातही जलदगतीने तपास पूर्ण करून दोषीला कठोर शिक्षा मिळावी, अशी अपेक्षा व्यक्त होत आहे.
सीसीटीव्हीच्या एका फुटेजने तपासाला कलाटणी दिली आणि ग्रामस्थांसोबतच चिमुकलीचा शोध घेणाऱ्या संशयिताचा चेहराच अखेर उघड झाला!
