DakshTimes News Network
थकबाकी न भरलेल्या वाहनांवर आरटीओची कारवाई; ऑनलाइन लिलावात सहभागी होण्याचे आवाहन
काशिनाथ शिंदे
पुणे : मोटार वाहन कायद्यातील विविध गुन्ह्यांमध्ये जप्त करण्यात आलेली तसेच वाहन कर आणि इतर शासकीय थकबाकी न भरल्यामुळे ताब्यात घेण्यात आलेली सहा वाहने आता ई-लिलावात काढण्यात येणार आहेत. प्रादेशिक परिवहन कार्यालय, पुणे यांच्या माध्यमातून हा जाहीर ई-लिलाव शुक्रवार, २१ ऑगस्ट २०२६ रोजी दुपारी १२ ते सायंकाळी ४ वाजेपर्यंत ऑनलाइन पद्धतीने होणार आहे.
इच्छुकांना एमएसटीसी इंडियाच्या संकेतस्थळावरून या ई-लिलाव प्रक्रियेत सहभागी होता येणार आहे. ई-लिलावासाठी पात्र सहा वाहनांची माहिती पुणे प्रादेशिक परिवहन कार्यालयाच्या सूचना फलकावर तसेच संबंधित संकेतस्थळावर उपलब्ध करून देण्यात आली आहे.
लिलावातील वाहनांची भंगार म्हणून विक्री करण्यासाठी आवश्यक अटी व शर्तीही संकेतस्थळावर प्रसिद्ध करण्यात आल्या आहेत. या प्रक्रियेत नोंदणीकृत वाहन भंगार सुविधा (RVSF) संस्थांनाही सहभागी होता येणार आहे.
दरम्यान, संबंधित वाहनमालक, चालक अथवा अन्य हितसंबंधित व्यक्तींना लिलावापूर्वी वाहनावरील थकबाकी आणि संबंधित रक्कम भरण्याची संधी देण्यात आली आहे. थकबाकीची पूर्तता करून वाहन सोडवून घेता येणार असून, त्यानंतर ई-लिलावाची प्रक्रिया पूर्ण करण्यात येणार आहे.
या ई-लिलावाबाबत अधिक माहितीसाठी नागरिकांनी प्रादेशिक परिवहन कार्यालय, पुणे येथे संपर्क साधावा, असे आवाहन करण्यात आले आहे.
