DakshTimes News Network
काशिनाथ शिंदे
मुंबई : घाटकोपरमधील लक्ष्मीनगर येथे महिलेचा गळा आवळून निर्घृण खून केल्याचा धक्कादायक प्रकार उघडकीस आला आहे. पंतनगर पोलिसांनी या प्रकरणाचा तपास अवघ्या काही दिवसांत करत मयत महिलेच्या सासूसह पाच आरोपींना अटक केली आहे. खुनासाठी तब्बल तीन लाख रुपयांची सुपारी देण्यात आल्याचे तपासात समोर आले आहे.
सपना प्रमोद गंजी (वय ३५) असे खून झालेल्या महिलेचे नाव आहे. सुरुवातीला बाथरूममध्ये पाय घसरून पडल्याने तिचा मृत्यू झाल्याचे भासविण्याचा प्रयत्न करण्यात आला होता. मात्र, मृतदेहाच्या गळ्याभोवती काळे-निळे डाग तसेच डोक्याला झालेला रक्तस्त्राव पाहून पोलिसांचा संशय बळावला.
१७ ऑगस्ट रोजी रात्री राजावाडी रुग्णालयातून पंतनगर पोलिसांना महिलेच्या मृत्यूची माहिती मिळाली. पोलिसांनी रुग्णालयात जाऊन मृतदेहाची पाहणी केली. त्यावेळी मयत महिलेची सासू धनलक्ष्मी भिक्षापती गंजी हिने सपना हिला भांडणातून ढकलल्याने ती बाथरूममध्ये पडून जखमी झाल्याचे सांगितले. मात्र, पोलिसांनी कसून तपास सुरू केल्यानंतर वेगळेच सत्य समोर आले.
पोलिस तपासात धनलक्ष्मी गंजी हिनेच सुनेच्या खुनाचा कट रचल्याचे निष्पन्न झाले. सपना हिच्याशी असलेल्या जुन्या वादातून तसेच तिच्याविरोधातील पूर्वीच्या तक्रारींच्या रागातून हा कट रचण्यात आल्याचे समोर आले.
धनलक्ष्मीने तिची पूर्वीची मोलकरीण मंगलाबाई सुरेश जाधव आणि तिच्या कुटुंबीयांना या कटात सहभागी करून घेतले. सपना हिचा खून केल्याच्या मोबदल्यात त्यांना तीन लाख रुपये देण्याचे ठरले होते.
१६ ऑगस्ट रोजी दुपारी साडेचारच्या सुमारास सपना घरात एकटी असताना आरोपी एकामागून एक घरात शिरले. सपना दारूच्या नशेत असल्याचा फायदा घेत तिच्या डोक्यात काचेचा ग्लास मारण्यात आला. त्यानंतर तिच्या डोळ्यांत मिरची पूड टाकून ओढणीने गळा आवळण्यात आला. तरीही तिचा जीव जात नसल्याने आरोपी सुरेश जाधव आणि साजन जाधव यांनी तिच्या गळ्यावर पाय ठेवून तिला ठार केल्याचे तपासात निष्पन्न झाले.
खून केल्यानंतर आरोपींनी घटनास्थळावरील पुरावे नष्ट करण्याचा प्रयत्न केला. मात्र, पोलिसांनी घटनास्थळावरील तांत्रिक पुरावे, सीसीटीव्ही फुटेज आणि आरोपींची चौकशी यांच्या आधारे खुनाचा कट उघडकीस आणला.
या प्रकरणी धनलक्ष्मी भिक्षापती गंजी हिला १७ ऑगस्ट रोजी अटक करण्यात आली. त्यानंतर मंगलाबाई सुरेश जाधव, शिवानी सुरेश जाधव, सुरेश गणपत जाधव आणि साजन सुरेश जाधव या चौघांना १८ ऑगस्ट रोजी अटक करण्यात आली. आरोपींना न्यायालयाने अनुक्रमे २४ ऑगस्ट आणि २८ ऑगस्टपर्यंत पोलीस कोठडी सुनावली आहे.
सदर कारवाई पोलीस आयुक्त देवेन भारती, सह पोलीस आयुक्त मनोजकुमार शर्मा, अपर पोलीस आयुक्त धनंजय कुलकर्णी, पोलीस उपायुक्त गणेश शिंदे, सहाय्यक पोलीस आयुक्त विलास दातीर यांच्या मार्गदर्शनाखाली वरिष्ठ पोलीस निरीक्षक लता सुतार, पोलीस निरीक्षक परशुराम लोंढे, अजित गोंधळी, राजेश चंदुगडे, अस्लम खतीब, सपोनि उमेश शिंदे, दगडू जाधव, प्रशांत कुंभार तसेच पंतनगर पोलीस ठाण्यातील अधिकारी व अंमलदारांनी केली.
