DakshTimes News Network
पिंपरी-चिंचवडमध्ये २,५०५ वाहनांवर कारवाई; ४०० सायलेन्सर, ८०२ काळ्या काचांच्या वाहनांवरही दंडात्मक कारवाई
काशिनाथ शिंदे
पिंपरी : फॅन्सी आणि नियमबाह्य नंबर प्लेट, मोठ्या आवाजाचे बेकायदा सायलेन्सर तसेच काळ्या काचा लावून वाहतूक नियमांची ऐशीतैशी करणाऱ्या वाहनचालकांविरोधात पिंपरी-चिंचवड वाहतूक पोलिसांनी धडक मोहीम हाती घेतली आहे. शहरातील विविध भागांत राबविलेल्या विशेष मोहिमेत फॅन्सी नंबर प्लेटच्या तब्बल २ हजार ५०५ प्रकरणांवर कारवाई करण्यात आली. याशिवाय सुमारे ४०० बेकायदा सायलेन्सर आणि ८०२ काळ्या काचा असलेल्या वाहनांवर दंडात्मक कारवाई करण्यात आली.
सांगवी, दिघी-आळंदी, वाकड, पिंपरी, मोशी, देहूरोड, तळेगाव, भोसरी, चिंचवड, निगडी, बावधन, चाकण आणि हिंजवडी वाहतूक विभागांच्या हद्दीत ही विशेष मोहीम राबविण्यात आली. नियमबाह्य किंवा अस्पष्ट नंबर प्लेटमुळे वाहनांची ओळख पटविण्यात अडथळा निर्माण होतो. त्यामुळे अशा वाहनचालकांना लक्ष्य करून पोलिसांनी कारवाईचा धडाका लावला.
या मोहिमेत निगडी वाहतूक विभागात सर्वाधिक ३६० वाहनांवर कारवाई करण्यात आली. त्यापाठोपाठ भोसरीमध्ये २७६, तळेगाव २५०, सांगवी २४०, चाकण २२८ आणि हिंजवडीमध्ये २२४ वाहनांवर कारवाई करण्यात आली.
दरम्यान, मोठ्या आवाजाचे तसेच नियमबाह्य सायलेन्सर बसवून ध्वनिप्रदूषण करणाऱ्या वाहनांवरही वाहतूक पोलिसांनी कारवाईचा बडगा उगारला. सुमारे ४०० बेकायदा सायलेन्सरवर कारवाई करून ४ लाख २२ हजार रुपयांचा दंड वसूल करण्यात आला. तसेच काळ्या काचा असलेल्या ८०२ वाहनांवर कारवाई करून ३ लाख ५५ हजार ५५५ रुपयांचा दंड आकारण्यात आला.
फॅन्सी नंबर प्लेटच्या १ हजार ४३८ प्रकरणांमध्ये ११ लाख ३९ हजार ५०० रुपयांचा दंड ठोठावण्यात आला. आकर्षक, अस्पष्ट किंवा नियमबाह्य पद्धतीने नंबर प्लेट लावल्याने वाहनाची ओळख लपविण्याचा प्रयत्न होऊ शकतो. त्यामुळे अशा वाहनांवरील कारवाई आणखी तीव्र करण्यात येणार असल्याचे वाहतूक पोलिसांनी स्पष्ट केले आहे.
पिंपरी, निगडी, हिंजवडी, चाकण, बावधनसह शहरातील प्रमुख मार्गांवर मोठ्या आवाजाचे सायलेन्सर बसविणाऱ्या वाहनांवर विशेष नजर ठेवण्यात येत आहे. फॅन्सी नंबर प्लेट, काळ्या काचा आणि बेकायदा सायलेन्सरचा वापर करणाऱ्यांनी सावध व्हावे; नियमांचे उल्लंघन केल्यास थेट दंडात्मक कारवाईला सामोरे जावे लागेल, असा स्पष्ट इशारा वाहतूक पोलिसांनी दिला आहे.
