DakshTimes News Network
दोन उपकेंद्रांत प्रत्येकी १० एमव्हीएची अतिरिक्त रोहित्रे कार्यान्वित; महापारेषणकडूनही १०० एमव्हीए क्षमतेच्या रोहित्राची तयारी
काशिनाथ शिंदे :पुणे
चाकण औद्योगिक क्षेत्रातील वाढती वीज मागणी आणि भविष्यातील औद्योगिक विस्तार लक्षात घेऊन महावितरणने वीज यंत्रणा सक्षम करण्यासाठी तातडीच्या उपाययोजनांना वेग दिला आहे. महावितरणचे संचालक (संचालन) धनंजय औंढेकर यांनी शनिवारी (दि. २२) चाकण एमआयडीसी परिसरातील वीजपुरवठा यंत्रणेची प्रत्यक्ष पाहणी करून आढावा घेतला. यावेळी ३३/२२ केव्ही भांबोली आणि ह्युंदाई उपकेंद्रांमध्ये प्रत्येकी १० एमव्हीए क्षमतेची रोहित्रे कार्यान्वित करण्यात आली.
ह्युंदाई येथील केंद्र यापूर्वी केवळ स्विचिंग स्टेशन म्हणून कार्यरत होते. मात्र, चाकण औद्योगिक क्षेत्रातील वाढता वीजभार लक्षात घेऊन त्याचे ३३/२२ केव्ही उपकेंद्रात रूपांतर करण्याचा निर्णय घेण्यात आला. मुख्य अभियंत्यांच्या पाठपुराव्यानंतर संचालक धनंजय औंढेकर यांनी या कामास तातडीने मंजुरी दिली. त्यानुसार ह्युंदाई केंद्राचे उपकेंद्रात रूपांतर करून ते कार्यान्वित करण्यात आले आहे.
याचबरोबर भांबोली उपकेंद्रातही अतिरिक्त १० एमव्हीए क्षमतेचे रोहित्र कार्यान्वित करण्यात आले. या दोन्ही उपाययोजनांमुळे चाकण औद्योगिक परिसरातील वीजपुरवठ्याची क्षमता वाढून औद्योगिक ग्राहकांना अधिक विश्वासार्ह वीजपुरवठा मिळण्यास मदत होणार आहे.
चाकण औद्योगिक क्षेत्राचा वेगाने विस्तार होत असून आगामी काळात विजेची मागणी मोठ्या प्रमाणात वाढण्याची शक्यता आहे. त्यामुळे महावितरण आणि महापारेषणच्या अधिकाऱ्यांनी समन्वयाने कामे वेळेत पूर्ण करावीत, भविष्यातील वीज मागणीचे अचूक नियोजन करावे आणि औद्योगिक ग्राहकांना दर्जेदार व अखंडित वीजपुरवठा मिळण्यासाठी आवश्यक उपाययोजना तातडीने पूर्ण कराव्यात, असे निर्देश धनंजय औंढेकर यांनी क्षेत्रीय अधिकाऱ्यांना दिले.
महापारेषणच्या अतिउच्चदाब यंत्रणेचीही पाहणी
धनंजय औंढेकर यांनी महापारेषणच्या ४०० केव्ही चाकण, २२० केव्ही ब्रिजस्टोन आणि २२० केव्ही चाकण फेज-२ या अतिउच्चदाब उपकेंद्रांचीही पाहणी केली. आगामी काळातील वीजपुरवठ्याचे नियोजन आणि सुरू असलेल्या कामांचा त्यांनी आढावा घेतला.
२२० केव्ही ब्रिजस्टोन उपकेंद्रात नुकतेच ५० एमव्हीए क्षमतेचे रोहित्र कार्यान्वित करण्यात आले आहे. तसेच ४०० केव्ही चाकण उपकेंद्रात २२ केव्हीचे चार अतिरिक्त फिडर बे उभारण्याचे काम सुरू आहे. २२० केव्ही चाकण फेज-२ उपकेंद्रात अतिरिक्त १०० एमव्हीए क्षमतेचे रोहित्र बसविण्यात येणार असल्याची माहिती महापारेषणच्या अभियंत्यांनी दिली.
या सर्व उपाययोजनांमुळे चाकण औद्योगिक क्षेत्रातील वाढत्या वीज मागणीला सामोरे जाण्यासाठी महावितरण आणि महापारेषणची यंत्रणा अधिक सक्षम होणार आहे.
