DakshTimes News Network
काशिनाथ शिंदे
गुन्हे शाखा युनिट-३मध्ये विद्यार्थिनींसोबत रक्षाबंधनाचा भावनिक सोहळा
पिंपरी-चिंचवड : रक्षाबंधनाच्या निमित्ताने गुन्हे शाखा युनिट-३च्या कार्यालयात ज्ञानाई हायस्कूल, चिखली-जाधववाडी येथील विद्यार्थिनींनी पोलिस अधिकारी व अंमलदारांना राखी बांधून रक्षाबंधनाचा सण उत्साहात साजरा केला. या उपक्रमातून पोलीस आणि समाजातील विश्वासाचे नाते अधिक दृढ झाले.
यावेळी विद्यार्थिनींना पोलिस विभागाच्या विविध उपक्रमांची माहिती देतानाच सायबर गुन्ह्यांपासून बचाव, गुड टच-बॅड टच, व्हिजिबल पोलिस तसेच महिलांच्या व मुलींच्या सुरक्षिततेसंदर्भातील महत्त्वपूर्ण मार्गदर्शन करण्यात आले. सायबर फसवणूक टाळताना कोणती काळजी घ्यावी, संशयास्पद प्रकार घडल्यास पोलिसांशी कसा संपर्क साधावा, याबाबतही विद्यार्थिनींना माहिती देण्यात आली.
कार्यक्रमात विद्यार्थिनींनी गुन्हे शाखेतील अधिकारी आणि अंमलदारांना प्रेमाने राखी बांधली. पोलिस बांधवांनीही या निरागस बहिणींना प्रेमाची छोटीशी भेट देत त्यांचा आनंद द्विगुणित केला. त्यामुळे रक्षाबंधनाचा हा सोहळा केवळ औपचारिक न राहता पोलीस-विद्यार्थिनी यांच्यातील जिव्हाळा आणि विश्वासाचे नाते जपणारा भावनिक क्षण ठरला.
पोलीस दलाकडून नागरिकांच्या सुरक्षेसोबतच विद्यार्थ्यांमध्ये कायदेविषयक आणि सुरक्षिततेबाबत जनजागृती करण्यासाठी राबविण्यात येणाऱ्या उपक्रमांचेही यावेळी महत्त्व अधोरेखित झाले.
“राखीच्या धाग्यातून जपलेला विश्वास आणि पोलिसांच्या सेवेतून दिलेली सुरक्षिततेची हमी,” असा संदेश देत या विशेष उपक्रमाची सांगता झाली. ज्ञानाई हायस्कूलच्या विद्यार्थिनी, शिक्षकवृंद आणि आयोजकांचे गुन्हे शाखा युनिट-३कडून आभार मानण्यात आले.
